মনিপুরদা লৈরিবা লৈঙাক অসীনা নেস্নেল ইদুকেসন পোলিসি (এন ই পি) ২০২০ মপূঙফানা চৎনহন্দনা ঙসীফাওবা লৈরিবা অসী য়ানিংদে। লৈঙাক অসিনা মহৈরোয়শিংগী পুন্সি মাঙহনবা য়ারোই, মহৈরোয়শিংগী পুন্সি কনবিয়ু হায়না ইম্ফাল কোল্লেজগী মহৈরোয়শিংনা কোল্লেজ অসিগী গেট মমাঙদা অকনবা খোল্লাউশিংগা লোয়ননা খোঙজঙ চঙশীনখ্রে। মহৈরোয়শিংগী একাদেমিক কেরিয়র মাঙহনবা য়ারোই, এন ই পি-২০২০ মপূঙফানা চৎনহনবা ঙমদ্রবা ষ্টেট লৈঙাক্কি ইদুকেসন মিনিষ্টর অমসুং ইদুকেসন দিরেক্তর খূদক্তা ফম থাদোক্কদবনি, মথৌ মশক খঙদবা ইদুকেসন কম্মিস্নার রিজাইন তৌ হায়না ইবা প্লেকার্দ কয়াসু মহৈরোয়শিং অদুনা শীজিন্নখি।
মহৈরোয় নূপীমচা অমনা ফোঙদোরকখিবা মতূং ইন্না, এন ই পি চৎনরবনি হায়দুনা কোল্লেজ অসিদা ৪ শুবা চহীগী দিগ্ৰি কোর্স চত্থরি, অদূম ওইনমক ৪ শুবা চহী অসী দিগ্ৰি কোর্স অসিগী অরোইবা চহী ওইগদৌরিবনি। অরোয়বা চহীগী কোর্স অসী করম্বা কোল্লেজদা তমগদৌরিবনো হায়বদু ষ্টেট লৈঙাক অসিনা হৌজিক ফাওবা মহৈরোয়শিংদা খঙহন্দনা লৈরি। মসীনা মরম ওইদুনা মহৈরোয়শিংদা চম্মম্নহল্লে হায়খি।
চৎনহনবা ঙম্লোইদবা ওইরবদি করি মরমগী মনিপুরদা এন ই পি চৎনহল্লিবনো, মহৈরোয়শিংনা ৬শুবা সেমিষ্টর লোইদ্রিঙৈ মমাঙদা ৪ শুবা, অরোয়বা কোর্স তমফম লোয়শঙ হাংদোকপিয়ু, মসী ঙম্লোইদবা ওইরবদি ইদুকেসন মিনিষ্টর, দিরেক্তর অমসুং কম্মিস্নারনচিংবা খূদক্তা শিন্দোক্লগা মথৌ মশক খঙবা, থৌনা লৈবা মীওইশিং খল্লগা মথৌ পুহল্লু হায়খি।