মনিপুরদা থোক্লিবা হীঙশাগী ঈরাং অসী মতম কুইমনখ্রে। ঈরাং অসী সেন্টর অমসুং ষ্টেট অনীমক্তা সাসন তৌরিবা বি জে পিগী দব্বল ইঞ্জিনগী লৈঙাকশিং অসিনা লোইশিন্ননবা ঙসিফাওবা করিগুম্বা থৌরাং অমত্তা পায়খৎলকপগী মমি তাদ্রে। মরূওইবা ইস্যু অসীগী ৱারোইশিন পুরক্ননবা ৱারেপ লৌগদৌরিবা অসীদি ষ্টেট এসেমব্লিদনি। মরূওইবা ৱারেপ লৌননবা খন্নরসি, এসেমব্লি মীফম কৌরো হায়দুনা কংগ্রেস পার্টিনা বি জে পিগী লৈঙাক অসিদা হঞ্জিন হঞ্জিন তকশীল্লবসু ঙসিফাওবা থৌশাদনা লৈথোক্লিবা অসী য়াম্না লাইবক থীবা অমনি হায়না হান্নগী চিফ মিনিষ্টরসু ওইরিবা কংগ্রেস লেজিসলেচর পার্টি (সি এল পি) গী লিদর ওক্রম ইবোবিনা ফোঙদোকখ্রে।
ইম্ফালগী বির টিকেন্দ্রজিৎ রোদতা লৈবা কংগ্রেস ভাবন্দা পাউমীশিংদা ৱা ঙাঙবদা মহাক্না ৱাফম অসী ফোঙদোকখিবনি। কন্সটিট্যুসনগী প্রোভিজন মতূংইন্না এসেমব্লিগী মীফম কৌফম থোকপা মতমদি য়াম্না হেন্দোকখ্রবনি অদুবু ষ্টেট লৈঙাক অসীনা হৌজিকফাওবা এসেমব্লিগী মীফম কৌননবা হোৎনদ্রিবা অসীদি কন্সটিট্যুসনগী প্রোভিজন ইন্দবনি, কন্সটিট্যুসন খোঙ্গাওনবনি।
মনিপুরদা মতম শাংনা লোইশিন্দনা লাক্লিবা হীংশাগী ঈরাং অসী বি জে পিগী দব্বল ইঞ্জিনগী লৈঙাক অসীনা লোইশিনগে হায়রবদি নোংমা-নিনিদা লোইশিনবা য়াবনি, লোইহন্দবগী ৱাখক্তনি হায়খি। পাউমীশিংগা উনখিবা থৌরম অদুদা এম পি সি সিগী প্রসিদেন্ট অমসুং ৱাংখেম কেন্দ্রগী এম এল এ কৈশাম মেঘচন্দ্র অমসুং সুগনু এ সিগী এম এল এ অমদি এম পি সি সিগী দিপ্যুটি লিদর কাঙুজম রঞ্জিৎসু শরুক য়াখি।