এম এল এ ৫০ না চপ মান্ননা সেন্টরগী লুচিংবশিংদা খোঙ থীনবীরো, নত্রবদি মীয়ামগী থিংঙমদ্রবা ঈহৌ মায়োক্নরকপা য়াই,মতমদুদা নীঙমদবা পোক্নরক্কনি: তোম্বী

থোক্লিবা হীংশাগী ঈরাং অসী থা তরানিপান শুরক্লফাওবা সেন্টর অমসুং ষ্টেট লৈঙাক্কি মায়কৈদগী অকনবা, চপ চানবা খোঙথাঙ লৌখত্তুনা থিংননবা হোৎনদবসি য়াম্না লাইবক থীবনি। কুকি-জো কাঙলূপকি এম এল এ তরা থাদনা লেমহৌরিবা এম এল এ ৫০ না সেন্টরগী লুচিংবশিংদা চত্তুনা চপ মান্নবা খোঙফমদা অকনবা মওংদা খোঙ থীন্দুনা হীংশাগী ঈরাং অসী লোইশিন্ননবা থবক পায়খৎপা মতম য়ৌরে। থবক অসী খূদক্তা লৌখৎহৌদ্রবদি ষ্টেট লৈঙাক্কি লুচিংবশিংদা মীয়ামগী অশাওবগা লোয়নবা শাথিরবা চৈবী- চৈথেং মায়োক্নরকপা য়াই হায়না সিভ সেনা মনিপুর য়ুনিটকি প্রসিদেন্ট ওইনা লৈরিবা দা. মোইরাংথেম তোম্বীনা ফোঙদোকখ্রে।

চৎলিবা থা অসীগী ১৪ দা বাবুপারাদা লৈবা পার্টি য়ুনিট অসীগী ওফিস্তা পাউমীশিংগা উনখিবা অমদা তোম্বীনা ৱাফম অসী ফোঙদোরকখিবনি। মহাক্না মখাতানা হায়, মমাঙ চহীগী মে ৩ দগী কুকি-চিন নার্কো- টেরো্রিষ্টশিংনা মৈতৈ ফূরূপকি মথক্তা চত্থরক্লিবা এত্তেক অসিদা ঙসীফাওবদা মীওই ২৫০ রোমগী পুন্সি পিখম্নহনখ্রে। মতম খরা লেপ্লুরবা হীংশাগী ঈরাং অসী তুং কোইনা লেপখ্রসনু হায়না মীয়ামগী পূক্নিংদা ফাওখিবনি অদূবূ কুকি মিলিটেন্টশিং অসিনা নৌহৌননা জিরিবামদা অকনবা মওংদা নোংমৈ কাপশিল্লকপদা সি আর পি এফকি জৱান শিবা, মীচম কয়া শিবা অমসুং থা অসীগী ১১ দা মিলিটেন্টশিং অসীনা অঙাং অহুম য়াওনা মীওই তরুক কিদনেপ তৌখিবদগী হৌজিকসু থাদোরক্ট্রি।

মপান্দগী লাকপা ফো্রেন্নরশিংনা লান্দারকপনি খঙনা-খঙনা লৈঙাক অসিনা থবক পায়খত্তনা ঙসীফাওবা লৈরিবা অসী অঙকপা পোক ই হায়খি। যমনিপুর কনবা হায়বসি মৈতৈখক্ত গী থৌদাং নত্তে, অতৈ য়েলহৌ ফূ্রুপশিংগীসু চপ মান্নবা থৌদাং লৈরিবনি হায়খি।