অনৌবা সেন্ট্রেল পুলিস কেন্টিন ১৬ মনিপুরদা হাংদোক্তুনা চান্নবা মমলদা মীয়ামগী তঙায়ফদবা চান-থক্নবা পোৎলমশিং ফংহনবা হৌখ্রে

হীংশা য়াওবা ঈরাং থোক্তুনা পোৎ চৈগী মমল কা হেন্না তাঙখৎলক্লিবা মনিপুরগী মীয়ামদা নোংমগী তঙায়ফদনা চঙবা ঈমূং- মনূংগী চেঙ-চাক, হৱাই- চেংৱাই, থাউ-থুম, মরূ-মরাঙগী ওইবা চীঞ্জাক্কি পোৎলমশিং মীয়ামদা চান্নবা মমলদা হায়বদি কা হেন্না ৱাংদবা মমলদা ফংহন্ননবা পান্দমদা সেন্ট্রেল পুলিস কেন্টিনশিং নৌনা হাংদোক্তুনা অহেনবা থৌরাং অমা সেন্টর লৈঙাক্না লৌখৎখ্রে। মসীগা লোয়ননা অনৌবা কেন্দ্রিয়া পুলিস কল্যান ভন্দার ১৬  মনিপুরদা থা অসীগী ১৭ তগী হাংদোক্লে হায়না য়ুনিয়ন হোম মিনিষ্টর অমিট শাহানা ফোঙদোকখ্রে। হৌখিবা নিংথৌকাবা নুমিত্তা নেস্নেল ন্যুজ এজেন্সি অমগা অখন্ননা উনখিবা অমদা হোম মিনিষ্টর অসীনা ৱাফম অসী ফোঙদোকখিবনি।

ঈরাংগী অৱাবা কয়াগী চৈথেং খম থেংনা মায়োক্নবগী মথক্তা চৎলিবা চহী অসীগী অঙনবা শরুক্তা মহৌশাগা মান্নদবা মওংদা কা হেন্না অকনবা নোং লেপ্তনা তাখিবা, অচৌবা লেন য়াওবা অকনবা নোংলৈ নুংশিৎনা মীয়ামগী য়ূম-কৈ, লন- থুম অমসুং ইংখোলদা হৌবা চান্না-থক্ননবা চীঞ্জাক্কি পোৎলমশিং পাক-সন্না মাঙহনখিবা লোয়ননা চিন-কুকি জো কাঙলূপকি মিলিটেন্টশিংনা মতম শাংনা নেস্নেল হায়ৱেশিং থিংজিনখিবা মরমনা লমদম অসীদা তঙায়ফদনা চঙবা চীঞ্জাক্কি পোৎলমশিং ফংনদবা অমসুং ফংলবসু মমল কা হেন্না তাঙখৎলকপগী অৱাবা কয়াগী চৈথেং খম থেংনা মীয়াম্না মায়োক্নরগা লৈরিবনি।

ফীভম অসী খরমখৈ কোকহন্ননবা পান্দমদা সেন্টরনা অনৌবা থৌরাং অসী লৌখৎলকপনি হায়খি। হান্নদগী মনিপুরদা হাংদোক্তুনা লৈরিবা সেন্ট্রেল পুলিস কেন্টিন ২১ অসীগী মথক্তা অনৌবা কেন্টিন ১৬ হাংলিবা অসী চীঙগী দিষ্ট্রিক্ট শিংদা কেন্টিন ৮ হাংদোকপগা লোয়ননা তম্পাক্কি দিষ্ট্রিক্টশিংদসু কেন্টিন ৮ হাংবা হৌরে হায়রি।