য়ুনিয়ন মিনিষ্টর ওফ কম্যুনিকেসন্স এন্দ দেভলপমেন্ট ওফ দি নোরথ ইষ্টর্ন রিজন (দোনর) শ্রি জ্যোটিরাদিত্য এম সিন্দিয়ানা থা অসীগী ১৭ তা ইম্ফাল দা থুংলখিবগা লোয়ননা মনিপুরগী গভর্নর অজয় কুমার ভাল্লা, চিফ সেক্রেটরি অমসুং লৈঙাক্কি মকোকথোংবা লুচিংবশিংগা রাজ ভবন্দা ৱারী-ৱাতায় শান্নরম্লবা মতূঙদা মতম ইকান কান্নদনা ইম্ফাল থাদোকখ্রে।
য়ুনিয়ন মিনিষ্টরগী পূঙ খরখক্কি খোঙচৎ অদূ নুমিৎয়ুংবা মতূঙ পূঙ ১.৩০ রোম তারকপদা ইম্ফাল ইন্টর্নেস্নেল এয়রপোর্ট তা থুংলরবা মতূঙদা রাজ ভবন তম্না লাকখি। মহাক্না রাজ ভবনগীদমক এয়রপোর্ট তা ঙাইহাক পন্থরগা লৈরিঙৈ চৈরক্তা পাউমীশিংনা হংখিবা ৱাহংগী পাউখুমদা হায়, প্রাইম মিনিষ্টর নরেন্দ্র মোদিনা মনিপুরদা লৈরিবা কম্যুনিটি পূম্নমক থোং মান্ননা চাওখৎহন্ননবা অকনবা মীৎয়েং চঙদুনা হোৎনবা লেপত্রি।
মনিপুরগী লৈরিবা সেক্তর খূদীঙমক চাওখৎহন্ননবগী মতাঙদা খন্ন- নৈননবা গভর্নরগা উনবা লাকপনি হায়না ফোঙদোক্লমখি। গভর্নরগা উনখিবা থৌরম অদুদা দোনর মিনিষ্ট্রিগী মখাদা লমদমসিদা পায়খৎলিবা অমদি পায়খৎকদবা প্রোজেক্টশিংগী মতাঙদা রিভ্যু তৌখি। হীরম অসীগা মরী লৈননা পৱার পোইন্ট প্রজেন্টেসন কাপথোক্তুনা পূন্না য়েংমিন্নখি হায়রি।