উচেক-লাং ৪ ফাগৎলগা ফোরেষ্ট ওফিস মমাঙদা মৈ থাদুনা মাঙহনখ্রে

ইম্ফাল ৱেষ্ট দিস্ট্রিক্ট কি মনূঙচন্না লৈরিবা ময়াঙ ইম্ফাল বেঙ্গুন মখাপাৎ অমসুং ঊচিৱা মনীঙ লোক্তাক মপালদা মীওই খরনা নোংমৈ কাপতুনা অমসুং উচেক-লাং থাক্তুনা লম্লক্কি উচেকশিং ফারে হায়বগী অকক্নবা পাউগী লীখূল অমা ফংবদগী জোইন্ট কোর্দিনেটিং কম্মিটি ওন ৱাইল্ডলাইব এন্দ বাইওদাইভর্সিটি (জে সি সি দব্লিয়ু বি) গী থৌমীশিংনা ময়াঙ ইম্ফাল পুলিস ষ্টেসনগী পার্সনেলশিং অমসুং ময়াঙ ইম্ফাল ফোরেষ্ট বিট ওফিসকি ষ্টাফশিং য়াওবা অপূনবা টিমগা খূৎম্নদুনা মফমশিং অদূদা খূদক্তা চঙশীন্দুনা উচেক ফারিবা মীওইশিং থিগৎতুনা চৈরাক পীননবা ওপরেসন চত্থখ্রে।
ওপরেসন অদুদা ময়াঙ ইম্ফাল পুলিস ষ্টেসনগী ওফিসার ইন-চার্জ দব্লিয়ু ধিরাজ কুমার,এ এস আই ওইরিবা ঐচ ব্রোজেন,ময়াঙ ইম্ফাল ফোরেষ্ট বিট ওফিসকি ষ্টাফশিং,এনভাইরনমেন্টল সোসিয়েল রিফোর্মেসন এন্দ সঙাই প্রোটেক্সন ফোরম অমদি লোকেল ভল্লন্টিয়রশিংসু শরূক য়াখি।

ওপরেসন অদূদা জোইন্ট টিমগী মীওইশিং অদূ চঙশীল্লকপা উবদগী নোংমৈ শীজীন্নদুনা উচেকশিং ফাননবা হোৎনরম্বা মীওই খরা ঈশীঙগী ঈপাক লান্থোক্লগা চেনখিবদগী ফাবা ফংহৌখিদে।অদূম ওইনমক মখোয়শিংদূনা পুখিবা নংহৌদবা উচেক লাং ৪ দি জোইন্ট টিম অদুনা ফাগত্তুনা পুরক্লবা মতূঙদা ময়াঙ ইম্ফাল ফোরেষ্ট বিট ওফিসকি মমাঙদা মৈ থাদুনা মাঙহনখি।মীরম লান্না পাইরকপা উচেকশিং লোক্তাকপাৎ অমসুং মনিপুরগী ঈশীঙ মরাঙ কায়না তূঙবা পাৎ কয়াদা হৌজিক নিংথমথাগী মতমসিদা মরাঙ কায়না চাক্তাররিবনি।মসীগী খুদোংচাবা লৌরগা মশাখক্কি খনবা,খুন্নাইগী য়েক্নবগী মশক ওইরবা মীওইশিংনা উচেক ফাননবা হোৎনরকপসি খ্বাইদগী লাইবক থীবনি। মসিদা লমদমসিগী মীয়াম্না চপ মান্ননা অকনবা মীৎয়েং চঙমীন্নদুনা থিংনবা হোৎনফম থোকপনি।উচেক ফাবা,হাৎপগী থবক-থৌরমশিং অসী মখাতানা চত্থহন্দনবা হেন্না কনবা দ্রাইব চত্থখিগনি হায়না জে সি সি দব্লিয়ু বি না মখাতানা ফোঙদোরক্লি।