ট্যুবরক্যুলোসিস মূত্থৎনবগী মতাংদা ৱান-দে মেদিয়া ৱার্কশোপ পাঙথোকখ্রে

হন্দ্রেদ-দে ট্যুবরক্যুলোসিস ইলিমিনেসন কেম্পেইন হায়না মিংথোনবা মেদিয়া ৱার্কশোপ অমা চৎলিবা মার্চ থা অসীগী ১, থাংজা নুমিৎকি অয়ূক পূঙ ৯.৩০ তাবদা ইম্ফালগী নিত্যাইপাৎ চুথেক্তা লৈরিবা মনিপুর লৈঙাক অসীগী দিরেক্তরেট ওফ ইনফোর্মেসন এন্দ পব্লিক রিলেসন্স কি ওদিটোরিয়মদা পাঙথোকখ্রে। মনিপুর লৈঙাক্কি হেল্থ সার্বিসেস দিপার্টমেন্ট অমসুং এদিটর্স গিল্ড, মনিপুর অনিনা খূৎশম্নদুনা পাঙথোকখিবা নোংমগী ওইবা মেদিয়া ৱার্কশোপ অদু হৌদোকপা থৌরমদা মনিপুর লৈঙাক্কি হেল্থ সার্বিসেস দিপার্টমেন্ট গী দিরেক্তর দা. চম্বো গোনমৈনা অথোয়বা মীথূঙলেন, ওল মনিপুর ৱার্কিং জর্নেলিষ্ট য়ুনিয়ন ( অমজু) গী প্রসিদেন্ট বিজয় ককচীঙতাবম্না অখন্নবা মীথূঙ অমসুং এদিটর্স গিল্ড মনিপুরগী প্রসিদেন্ট খোগেন্দ্র খোমদ্রাম্না থৌরম মপূ ওইনা শরুক য়াখি।

অথোয়বা মীথূঙলেনগী ৱারোলদা দা. চম্বো গোনমৈনা, হৌজিক ইন্দিয়া অমসুং মনিপুরদা ট্যুবরক্যুলোসিস (টি বি) লায়নাগী ওইরিবা শক্তম মীয়ামদা শুগাইনা ফোঙদোকখিবগা লোয়ননা লায়না মখল অসী মেদিকেল সাইন্স চাওখত্রিঙৈ মতমদা মী য়াম্না শিগনবা অমা ওইবনা মালেমগী মীয়াম্না য়াম্না কিনবা অমা ওইরম্লবসু ঙসিদি অতেনবা মতমদা মপূঙফানা মূত্থত্তুনা অনাবশিংগী পুন্সি কনবা ঙম্লে হায়খি। লায়না অসী ঈশা-ঈশাদা সিম্পটম লৈব্রা হায়বদু মেদিকেল টেষ্ট তৌথোক্তুনা য়েংথোকপিহৌদ্রবদি মী শিবা অমসুং অৱাবা কয়া মায়োক্নহল্লকপা য়ারি হায়খি।

ঙসীগী প্রোগ্রাম অদুগী টেক্নিকেল সেসন্দা ষ্টেট টি বি ওফিসার অমসুং অতৈ ওফিসারশিংনা পৱার পোইন্ট প্রজেন্টেসনগা লোয়ননা লায়না অসীগী মরমদা শুগাইবা ৱাফম কয়া থমখি।