চৎলিবা দিসেম্বর থা অসীগী ১৬ কি নুংদাং পূঙ ৮.৩০ রোম তারকপদা বিষ্ণুপুর দিষ্ট্রিক্টকি মনূঙচন্না লৈরিবা তোর্বূঙ সাবল মনীঙ লৈকাইগী এরিয়াদা চুরাচান্দপুর মায়কৈরোমদগী কুকি মিলিটেন্টশিং ওইগনি চিংনবা শকখঙদবা খূৎলায় পায়বশিংনা নোংমৈ অমদি বোম শীজীন্নরগা অকনবা মওংদা এত্তেক তৌরক্তুনা,হন্দক্তা মশা-মশাগী য়ূমদা হঞ্জিনহনখ্রবা আই দি পিশিংদা অকি-অখঙ মায়োক্নহল্লম্বা থৌদোক অদূগী মতাঙদা চপচাবা থবক পায়খৎনবা অমসুং এত্তেক্করশিং অদু থেংননবা লৈঙাক্না অহেনবা সেক্যুরিটি ফোর্স থাজীনখ্রে।
নাকল অমরোমদা,কোকোমিগীকনভিনর খূরায়জম অথৌবনা লুচিংবা টিম অমনসু তোর্বূঙদা চত্তুনা ফীভমশিং য়েংশিনখ্রে।হৌখিবা চহী অহুম্লোম ঈরাংনা মরম ওইদুনা লাঞ্জেন্নবদগী রিলিফ কেম্পশিংদা লৈরুরবা মতূঙদা তোর্বূঙগী খুঞ্জাশিং অদূ নুমিৎ খরনিগী মমাঙদা বিষ্ণুপুর দিষ্ট্রিক্ট এদমিনিষ্ট্রেসন্না মশা-মশাগী মহৌশাগী লৈফমশিংদা হঞ্জিনহনখিবনি।কুকি মিলিটেন্টশিংদগী লৈঙাক্না খূৎলায়শিং লৌখত্রিফাওবা তম্পাক্কি মফম কয়াদা হনবা নাইদনা লম্বী থিংবা য়াওনা মখল-মখা কয়াগী খোঙজঙ চঙশীনবা হৌখ্রে।
ন্যু চেক্কোন ৱিমেন সোসাইটি,আই দি পিশিং অমসুং ঈমাশিংগী লূপ কয়ানা থোক্লক্তুনা ন্যু চেক্কোন মায়কৈদা অকনবা প্রোটেষ্ট তৌদূনা লম্বী থিংবা তৌখ্রে।অতৈ মফম কয়াদসু মীয়াম্না লৈঙাক্কি মীচঙ-মীখায় নাইবা থৌশিল য়ানিংদে হায়দুনা অকনবা ঈহৌ চঙশীল্লকপা হৌখ্রে।লমদমসিদা ঈরাং লৈত্রে হায়দুনা তম্পাক্কি খুঞ্জাশিং ঙাক্লম্বা ভিল্লেজ ভল্লন্টিয়রশিংনা পায়রম্বা খূৎলায়শিং লৈঙাক্না খোমগৎখ্রগা কুকি -জো কাঙলূপকি মিলিটেন্টশিংদা খূৎলায় পায়হন্দুনা মনীঙ তমহল্লি।কাপ্নীংবা মতমদা নোংমৈ কাপহন্দুনা মৈতৈশিংদা লান্দাহল্লি হায়না ন্যু চেক্কোন ৱিমেন সোসাইটি গী জেনরেল সেক্রেটরি হুইদ্রোম মালিনিনা পেন্দবা ফোঙদোকখি।
