মনিপুর পুলিস, এক্সসাইজ অমসুং অতৈ সেক্যুরিটি ফোর্সশিংনা তোঙান-তোঙানবা মফমশিংদগী ফাগৎলকখিবা দ্রগকি পোৎলমশিং মৈ থাদুনা মাঙহনবগী থবক ঙরাং শীজা কম্মন বাইওমেদিকেল ৱেষ্ট ট্রিটমেন্ট ফেসিলিটিদা পাঙথোকখ্রে।
থৌরমদুদা মনিপুরগী চিফ সেক্রেটরি রাজিভ সিংহনা পাউমীশিংগা উনখিবা অমদা হায়, প্রাইম মিনিষ্টর অমসুং য়ুনিয়ন হোম মিনিষ্টর অমিট শাহাগী অকনবা মীৎয়েং মখাদা মনিপুরদা দ্রগ অমদি দ্রগকা মরী লৈনবা নিষাগী পোৎলমশিং মপূঙফানা মূত্থৎনবা অহেনবা মীৎয়েং চঙদুনা লৈঙাক অসীনা হোৎনরি। য়ূমথঙনরিবা ষ্টেটশিংগা কোওপরেসন অমসুং কোর্দিনেসনগী থবক কনখত্তুনা দ্রগকি পোৎলমশিং মরূ ফংনা মাঙহন্ননবা হোৎনরি হায়খি।
ঙরাং মৈ থাদোক্তুনা মাঙহনখ্রবা দ্রগকি তোঙান-তোঙানবা মখলশিং অদূগী মনুঙদা হেরোইন পাউদর কিলোগ্রাম ৬.০০১, ব্রাউন সুগর কেজি ৮৬.৮৭১, দব্লিয়ু ৱাই টেব্লেট কেজি ২২.১২৮, স্যুদোএফিদ্রিন টেব্লেট কেজি ৩৬.০৭৯, গঞ্জা কেজি ১৮১.৬৮৭,এস পি কেপস্যুল কেজি ০.০৪৭ য়াওখি।
মখাতানা লৈঙাক অসীনা দ্রগ স্মগ্লরশিংগী মথক্তা অকনবা থবক- থৌরম কয়া লৌখত্তুনা লমদম অসীদগী নিষাগী পোৎলমশিং মপূঙফানা মূত্থত্তুনা দ্রগ ফ্রী ষ্টেট অমা ওইহন্ননবা থৌরাং লৌখৎলি হায়না দি জি পিনা পাউমীশিংদা ফোঙদোকখি।
