থৌবাল দি সি কমপ্লেক্সতা এত্তেচ তৌদুনা লৈরিবা বি এস এফ পার্সনেল অহুম অঙকপা মওংদা লেকথরকপদগী পূঙ ২৪ গী মনূঙদা লৈখিদ্রে, মিপাইনরে

য়াম্না মিপাইনিঙায় ওইবা অঙকপা থৌদোক অমা ওইনা নহান জানুয়ারি ১৩ দগী ঙরাং অয়ূক ফাওবগী মনূঙদা থৌবাল দি সি ওফিস কমপ্লেক্সেতা এত্তেচ তৌদুনা লৈরিবা ৬৩ শুবা বোর্দর সেক্যুরিটি ফোর্স বট্টালিয়নগী  বি কম্পেনিদা লৈবা পার্সনেল অহুম খূদক খূদক্তা  ৱান্থরকপা অমসুং লেকথরকপদগী হোস্পিটালদা ঙাইহাক-ঙাইহাক লায়কন্নরম্লবা মতূঙদা লৈখিদ্রে।  থৌদোক অসিনা মরম ওইরগা লৈহৌরিবা অতৈ বি এস এফ পার্সনেলশিংশু কা হেন্না মিপাইনরে হায়রি।

ঙরাং অয়ূক পূঙ ৮.২৬ লোম চৎলকপা মতমদা অহানবা ওইনা বি এস এফকি বট্টালিয়ন অসীগী বি কম্পেনিদা লৈবা অদুগা হৌজিকনা থৌবাল দি সি কমপ্লেক্সতা এত্তেচ তৌদুনা লৈরিবা জম্মু কাস্মিরগী সন্দ্রি পাট্টনদগী রবিন্দর সিংহ (৪৬) কৌবা হেদ কন্সটেবল অমা খঙহৌদনা স্বর হোনবা ঙম্লক্তবা অমসুং থবাক নারকপদগী থৌবাল দিষ্ট্রিক্ট হোস্পিটালদা লায়কন্ননবা পুখৎলবা মতূঙ মখাতাবা লায়েঙগীদমক রিমসতা রিফর তৌদুনা লায়কন্নরবা মতূংদা লৈখিদ্রে। চৈরকশিদা উত্তর প্রদেশকি নাগলা কেশ্রিদগী দি সি কমপ্লেক্স অসিদা সন্ট্রি তাদুনা লৈবা চন্দ্র (৫৪)  কৌবা হেদ কন্সটেবল  অমসু চপ মান্নবা লায়না লাইওংনা লেকথরকপদগী থৌবাল দিষ্ট্রিক্ট হোস্পিটালদা লায়কন্ননবা পুখৎলবা মতূঙ মখাতাবা লায়েঙগীদমক রিমসতা রিফর তৌদুনা লায়কন্নরবা মতূংদা লৈখিদ্রে।

থৌদোক অসীনা মরম ওইরগা লৈহৌরিবা অতৈ বি এস এফ পার্সনেলশিং কা হেন্না মিপাইনরিঙৈ চৈরক্তা মফম অসীমক্তদা লৈমিন্নরিবা অতোপ্পা বি এস এফ পার্সনেল, ভিপেন্দ্র সিংহ রাৱৎ কৌবা অমসু লেকথরকপদগী শীজ হোস্পিটালদা লায়কন্ননবা পুখৎলবা মতূঙ ঙাইহাক লায়কন্নরবা মতূঙদা লৈখিদ্রে হায়রি। অঙকপা লায়না লাইওং অসি করিনো, করম্বনো হায়বা হৌজিকমক্কি ওইনদি খঙবা ঙম্নদ্রি। বি এস এফ পার্সনেলশিংনা হৌজিক লৈরিবা মফম অদূ লাইফম য়াম্না কনবা মফম্নি হায়না মীয়াম্না মহৌশাদগী ঙাঙনবদি লৈ হায়রি।