ঐখোয় মীওইবনা খূৎলীংবা মালেম অসীদা নূপী ওইবিশিংগী মশা-মঊ ফনা, তীঞ্জঙ-কায়জঙদনা লৈহনবনা খুন্নাইদা চাওখৎপা পুরকপগী মথক্তা অফবা তুংলমচৎকি মীরোল অমা শেমগৎপা ঙম্লক্কদৌরিবনি হায়না চুরাচান্দপুর মেদিকেল কল্লেজগী দিন ( একাদেমিক) ওইনা থৌ পুরিবা দা. সি ঐচ অরুনকুমারনা ফোঙদোকখ্রে।
ঙরাং ইম্ফাল ইষ্ট দিষ্ট্রিক্ট মনূঙচন্না লৈরিবা ক্যামগৈদা লৈরিবা চুরাচান্দপুর মেদিকেল কল্লেজদা ৱিমেন্স হেল্থ এন্দ ফেমিলি ৱেল-বিইং হায়বা থিমদা, স্বাস্থা নারি শসক পরিবার আভিয়ানগা মরী লৈননা পাঙথোকখিবা ফ্রী হেল্থ কেম্প অমদা মহাক্না ৱাফম অসী ফোঙদোরকখিবনি।
দা. অরুনকুমারনা মখাতানা হায়, প্রাইম মিনিষ্টর নরেন্দ্র মোদিগী মীৎয়েঙ মখাদা লৈবাক অসীদা লৈরিবা নূপী ওইবীশিং, মরূওইনা মীরোল্লিবি নূপীশিং অমদি মখোয়না পোক্লক্কদৌরিবা অঙাঙশিং অদূগী মশা- মঊ ফনা থম্ননবা পান্দমদা স্বাস্থ নারি শসক পরিবার আভিয়ানগী প্রোগ্রাম অসী চৎলিবা সেপ্তেম্বর থা অসীগী ১৭ তগী লাক্লিবা ওক্তোবর অনী ফাওবা চত্থরক্লি। কেম্প অদূদা লাকখিবা মীওইশিংদা লেম্না হীদাক-লাংথকশিং য়েন্থোকখি।মীয়াম্না লূ-নানবা, মশা- মঊ ফবা অফবা খুন্নাই অমা শেমগৎমিন্নরসি হায়না দা. অরুনকুমারনা মরী লৈনবশিংদা আপিল তৌখি।