রিপব্লিক দে মমাঙদা বি জে পিনা মনিপুরদা পোপ্যূলর লৈঙাক অমা থম্ননবা থৌরাং তৌরি

লাক্লিবা কুমশিং ২০২৬ কি জানুয়ারি ২৬ তা পাঙথোক্কদৌরিবা লৈবাক অসিগী রিপব্লিক দে থৌরম মমাঙদা মনিপুরদা বি জে পিনা লুচিংবা পোপ্যুলর লৈঙাক অমা থম্নবগীদমক পার্টি অসিগী নেস্নেল লিদরশিংনা থৌরাং তৌরি হায়না থাজবা য়াবা পাউগী লীখূল অমনা খঙহল্লক্লি। মতাঙসিদা নৈনবা য়ারিবা ৱাফম অমনা, মনিপুরদা বি জে পিনা লুচিংবা লৈঙাক অমা শেম্লকপা তারবদি কংগ্ৰেস পার্টিগী এম এল এশিং নত্তনা অতৈ এম এল এ ৪৪ না শৌগৎকনি হায়রি। কুকি -জো কাঙলূপকি এম এল এ ১০ গী ওইনদি মখোয়গী মরক্তগী খরনা মনিপুর লৈঙাক শেম্বদা মশাগী পূক্নীঙ-ৱাখলদা শরুক য়ানিংবা লৈরবসু মপান থোক্না শৌগৎপা ঙম্বগী থৌনা -লিংজেল অদূমদি মনূঙদগী থুদেকপিদুনা লৈখিবনা মশাগী ওইবা অনীঙবা অপাম্বা ৱাফম অমত্তা মনীঙ তম্না ফোঙদোক্নবগী পাঙ্গল লৈখিদবনা পোপ্যুলর লৈঙাক অসীদা য়াওগনি হায়বগী ৱাফম অদূমদি হৌজিক ফাওবগী ফীভম অসিদা য়াম্না লাপ্না লৈরি।

সেন্টরগী লুচিংবশিংগী মতূঙ ইন্নদি মৈতৈ অমসুং কুকি কাঙলূপকি এম এল এশিং শন্টাইনবা অমদি য়ানবা অমগী মখাদা মনিপুরদা মীয়ামগী লৈঙাক অমা শেম্বা য়াননবা থৌরাং পূম্বা লৌখৎপা লোইরে হায়রি।অমরোমদা,ভিল্লেজ ভল্লন্টিয়র ফোর ইষ্টর্ন জোন ( কুকি জোগম) কৌবা লূপ অমনা চেরোল অমা থাদোক্তুনা, মনিপুরদা মৈতৈ কাঙলূপ য়াওবা পোপ্যুলর লৈঙাক অমা শেম্লকপা মতমদা কুকি- জো ফূরূপকি এম এল এ অমত্তা য়াওবা য়ারোই হায়না অকনবা ৱার্নিং তৌরকখিবনি।

মৈতৈ অমসুং কুকি কাঙলূপকি মরক্তা হৌজিক্তি জিওগ্ৰাফিকেল্লি অমসুং পোলিটিকেল্লি তোঙান তোঙানবা থাক্তা লৈখ্রবনি হায়বসি কুকি -জো এম এল এ শিংনা খঙজীনগদবনি হায়না লূপ অসীনা দিসেম্বর ২০ দা চেরোল অমা থাদোরক্তুনা মরী লৈনবশিংদা খঙহনখ্রবনি।