মীতোপ মশক খঙদোক্তনা,দেলিমিটেসন তৌহৌদ্রৈঙৈদা মীকোক থীবদা মনিপুর য়াওখ্রবদি ঐখোয়গী তুংলমচত্তা অকায়বা লাক্লগনি:সঞ্জয়

মনিপুরদা দিলিমিটেসন অমদি মীতোপ খন্দোকপগী থবক-থৌরমশিং চত্থদ্রিঙৈ চৈরক্তা সেন্সসকি থবক লৌখৎখিবা তারবদি লমদম অসীগী মীয়ামগী তুংগী লাইবক্তা অৱাবা,খুদোংচাদবা কয়া মায়োক্নরক্কনি অদূগা লমদমসিগী সোসিও-পোলিটিক্সতা শাথীনা অকায়বা লাক্লগনি।মরম অদূনা মীতোপ খন্দোকপা অমসুং দিলিমিটেসনগী থবক হান্না লোইরবা মতূঙদা সেন্সসকি থবক পায়খৎহনগদবনি। মসীগীদমক লমদম অসীদা লৈমিন্নরিবা য়েলহৌমী ফূরূপশিংনা অমত্তা ওইনা অকনবা খোঙজঙ চঙশীনমিন্নদুনা লেপমীন্নবগী তঙায়ফদবা লৈরি হায়না সোসিয়েল ৱার্কর সঞ্জয় অহন্থেম্না নুংনাংবা ৱাফম ফোঙদোকখ্রে, চেকশীল ৱারোল থম্লকখ্রে।

ৱাঙূ সাবলদা লৈরিবা মহাক্কি য়ূমদা ঙরাং মায়কৈ অদোমদা লৈরিবা মীয়ামগা লোয়ননা সেন্সস ২০২৬-২৭ গা মরী লৈননা পাঙথোকখিবা ৱাকৎ মীফম অমদা মহাক্না শরুক য়ারদুনা ৱাফম অসী ফোঙদোকখিবনি।মহাক্না মখাতানা হায়,মীতোপ খন্দোক্ট্রিঙৈদা সেন্সসনা হান্না পাঙথোকখিবা তারবদি, কুমশিং ২০২৩ গী মে থাদগী হৌজিকফাওবদা লাঞ্জেন্নরগা রিলিফ কেম্পশিংদা লৈরিবা মৈতৈ ফূরূপকি হাঙহৌরবা খুঙ্গংশিং হাওস লিষ্টিং তৌবা অমদি ভিল্লেজ সর্ভে তৌবদা য়াওররোই।মপান লৈবাকশিং, মরূ ওইনা ম্যান্মারদগী আইনগী ৱাংমদা চঙশীল্লকখ্রবা ইম্মিগ্ৰেন্ট লীশীঙ কয়ামরুম লৈরিবসি ইন্দিয়াগী বোনাফাইদ সিটিজন ওইনা রিকগনাইজ তৌখ্রগনি।

মহাক্না মখা তানা হায়, মনিপুর লৈঙাক্না রিকগনাইজ তৌদনা লৈরিবা, ম্যান্মারিজশিংনা লৈরিবা অনৌবা খুল ১৮০০ হেনবা অসীসু রিকগনিসন পীখ্রগনি। থৌওং অসীনা ঐখোয়গী খুন্নাইদা হীরম খূদীঙদা অচৌবা চৈফূ অমা মায়োক্নরক্লগনি হায়খি। চহী ১০ খুদীঙগী পাঙথোকপা সেন্সস অসীদা ইন্দিয়া পূম্বগী ওইনা হেঙ্গৎলিবা মীশীঙগী চাং অসী চাংচত্তা চাদা ১৭.৭ ওইরি অদূবু মনিপুরগী ওইনদি চহী তরাদা চীঙগী দিষ্ট্রিক্ট খরদা চাদা ৪১ ওইরম্বা থেংনখিবা অসী য়াম্না কিনিঙায় ওই হায়নসু সঞ্জয়না ফোঙদোকখি।