ঈমালোন চাওখৎহন্ননবা ঐখোয় পূন্না হোৎনমিন্নরসি, মনিপুরি লোল মূৎখ্রবদি ঐখোয়গী খুনাই অসিসু মমি শামখ্রগনি : এম এস এফ

ঈমালোল মনিপুরি চাওখৎহন্ননবা ঐখোয় পূন্না হোৎনমিন্নরসি, মনিপুরি লোল মূৎখ্রবদি ঐখোয়গী খুনাই অসিসু মমি শামখ্রগনি হায়না মনিপুরি ষ্টুদেন্স ফেদরেসন( এম এস এফ)না মীয়ামদা ফোঙদোরক্লি। ঙরাং ইম্ফালগী ক্বাককৈথেলদা লৈবা মহৈরোয় লূপ অসীগী ময়ায় লোয়শঙদা পাউমীশিংগা উনবদা লূপ অসীগী প্রসিদেন্ট হিজম রোসন্না ৱাফম অসী ফোঙদোকখিবনি। মহাক্না হায়, ঐখোয়গী ঈমালোল ওইরিবা মনিপুরি লোল অসী মূৎখ্রবদি ঐখোয়গী খুনাই অসিসু মূৎখ্রগনি। মনিপুরি লোল অসী য়াম্না ঈনাক খুনবা লোল অমনি। ষ্টেট লৈঙাক অসীনা লোল অসীদা পূক্নিং চঙবা ৱাৎপদগী মীয়াম, থোইদোক-হেন্দোক্না মহৈরোয়শিংদা মরাং কায়নাফংহনগদবা টেক্স বূকশিং, রিফরেন্স বূক, কম্পিটিটিব ইগজামিনেসনশিংদা দরকার ওইবা লাইরিকশিং মনিপুরি লোলদা ফংনদবগী অচৌবা খুদোংচাদবা কয়া ঙসী মায়োক্নরগা লৈরি।

ষ্টেট লৈঙাক অসীগী মখাদা লৈরিবা দিরেক্তরেট ওফ লেঙ্গুয়েজ প্লান্নিং এন্দ ইমপ্লিমেন্টেসন্না মনিপুরি লোল চাওখৎহন্ননবা ঙসীফাওবদা করি-করম্বা অহেনবা খোঙথাং লৌখৎলক্লিবগে হায়বসি হৌজিক ৱাহং অমা ওইরি হায়না রোসন্না ফোঙদোকখি।কন্সটিট্যুসনগী নিপানশুবা সেদ্যুল্ড দা চনখ্রবসু ষ্টেট লৈঙাক্না ইনিসিয়েটিব লৌবগী ৱাখল থোইনা লৈতবা অমসুং  থৱায় য়াওবিবগী চাং য়াম্না হন্থখিবনা মহৈরোয়শিংদা ঈমালোল অসীদা ফোঙবা ষ্টদি মেটরিয়েলনচিংবগী  অৱাৎপা কয়ামরুম মায়োক্নরগা লৈরি। মশী য়াম্না লাইবক থীবনি হায়খি।

মালেমগী চাওখৎপদা পন্দোল লোমখ্রবা লৈবাকশিংদি মমালোল চাওখৎহন্দুনা মশাগী মরোল অমসুং ময়েক শীজীন্নরগা মহৈ তমদুনা থা,  থৱানমিচাক্কি লমদম পাংনখ্রবা মতমশিদা ঙসী ঐখোয়না ঈশাগী ঈরোল, ঈয়েক লৈনা-লৈনা মীরমগী ষন্না মচী শাংবা হেল্লি মতাগুম তরঙ-মালঙদা লম্মূক্নদুনা লৈফম থোক্তে। মনিপুরি ভাসা সম্বাধন্নসু মীফম পাঙথোক্তুনা মনিপুরি লোল অসী হেন্না চাওখৎহন্ননবা থবক পায়খৎপিয়ু হায়খি।