আইন কায়না ম্যান্মারদগী মনিপুরদা খুন্দাশিনখ্রবশিং খন্দোক্তুনা দিপোর্ট তৌদ্রিঙৈদা মতৌ করম্না সেন্সস চত্থগদৌরিবনো: সঞ্জোই

মনিপুর য়াওনা ইন্দিয়াগী ষ্টেট খরদা পোপ্যুলেসন অমসুং হাওস সেন্সস অমা মথঙ চহীগী এপ্রিল অমদগী চত্থবা হৌরগনি হায়না রেজিষ্ট্রার জেনরেল ওফ ইন্দিয়া ম্রিট্যুঞ্জয় কুমার নরায়ন্না হন্দক নোটিফিকেসন অমা থোক্লক্লিবসি মনিপুরদা হৌজিক করি করম্বা দেমোগ্ৰাফিক অমসুং পোপ্যুলেসন ইম্বেলেন্স মায়োক্নরিবগে খঙদবা, মনিপুরগী গ্ৰাউন্দ রিয়েলিটি খঙদবা মেনলেন্দ ইন্দিয়াগী ওফিসার অমগী হৌনবী মচৎনি। মহাক্কি নোটিফিকেসন অদূ মনিপুরিশিংনা কৈদৌনুংদা মৱা লৌরোই হায়না সোসিয়েল এক্টিভিষ্ট সঞ্জয় অহন্থেম্না ফোঙদোকখ্রে।

কুমশিং ২০০১ অমসুং কুমশিং ২০১১ দা নিয়ম লান্না মীকোক থীবগী থবক পাঙথোকখি হায়বগীদমক মনিপুরিশিংনা নিংদোন পোমদুনা লৈনরিবনি। চৈরকশিদা মনিপুরদা আইন কায়না নৌনা ম্যান্মার, বংলাদেশনচিংবা লৈবাকশিংদগী চঙশীল্লক্লিবা মীরৈবাক মচাশিংনা ষ্টেট অসীগী চীঙখোঙ-চীঙয়াশিংদা খুন্দাশিল্লক্তুনা লমদম অসীগী রিছোর্স কয়া মাঙ-তাকহন্দুনা ঙসীফাওবা লৈশিল্লিবা অসীদা লৈঙাক অসীনা করিগুম্বা থবক অমত্তা লৌখত্ত না লৈরি। মীতোপ খন্দোক্ননবা থবক পায়খৎপা হৌরকখিবা নোংথোম্বম বিরেন্না লুচিংবা লৈঙাক অদূ লম্লৌ চাউবা, কোলোনিয়েল লৈঙাক ইন্দিয়ানা চিংথদুনা প্রসিদেন্ট রুল থমজিল্লবা মতূঙদা মীতোপ অমত্তা মনিপুরদগী খন্দোক্ট্রিঙৈদা মনিপুরদা পোপ্যুলেসন অমসুং হাওস সেন্সস চত্থরগনি হায়রক্লিবসি মনিপুরিশিংনা কৈদৌনুংদা য়াবা ঙম্লোই হায়না মহাক্না ফোঙদোকখি।

ইল্লিগেল মাইগ্ৰেন্টশিং হান্না খন্দোক্লবা মতূঙদা মশা-মশাগী মরমদা দিপোর্ট তৌখিগদবনি, মদূ নত্রগা মখোয়গীদমক অখন্ননা শেম-শারবা দিটেন্সন কেম্প অমদা মতম খরগী ওইনা পুল্লপ থমজিল্লবা মতূঙদা পোপ্যূলেসন অমসুং হাওস সেন্সস পাঙথোকফম থোকই হায়না মহাক্না ফোঙদোকখি। মনিপুর ষ্টেট অসী ৱাথোক য়াম্বা ষ্টেট অমনি। ইস্যু অমগী মথঙদা অতোপ্পা ইস্যু অমা লোইবা নাইদনা থোক্লকপা লমদম অমনি। মীতোপ ময়ামসিনা হান্না লৈজরম্লিবা য়েলহৌমীশিং অসীদগী মশীঙ হেঞ্জিল্লকপগী থাক য়ৌশিল্লক্লবনি। মীতোপশিং অসী খন্দোক্ট্রিঙৈদা সেন্সস চত্থরবদি মখোয়না হয়েং মতূঙ তারকপদা ইন্দিয়াগী বোনাফাইদ সিটিজন্নি হায়না ক্লেম তৌরকপদা কনানসু য়েৎলুবা ঙম্লরোইদবনি হায়না সঞ্জয় না নুংনাংবা ফোঙদোকখি।