মৈতৈগী কলচরগা, ধর্মা অমদি পুৱারিগা তৎন-থানবা য়াদনা শাগোন্নরক্লবা, পুৱারিগী থৌদোক ৱাথোকশিংগা লোয়নদুনা লাক্লবা, খ্বাইদগী মরূওইবা লাইফম্লেনশিংগী মনূঙদসু অমা ওইরিবা মোইরাং থাংজিং ঈবূধৌগী খূভমদা লাই খুরুম্বা চঙবা য়াহন্দনা ঙসী ফাওবা লৈরিবা অসীগী মতাঙদা মীফম অমা ঙরাং পাঙথোক্তুনা খন্ন-নৈনখ্রে। মোইরাংদা লৈরিবা শান্তি মান্দোপতা পাঙথোকখিবা মীফম অদুদা থাংজীং সেবা মন্দল ফম্নাইবা চৈরাপ লোয়শঙ অনুল আই দি এম অমদি অতৈ লূপ কয়াগী মীহূৎশিং শরূক য়াখি।
মীফম অদুদা মরূওইনা খন্নখিবদি, হৌখিবা কুমশিং ২০২৩ গী মে অহুমদগী হৌরকখিবা মৈতৈ-কুকি কম্যুনিটি অনীগী মরক্তা থোক্লিবা হীঙশাগী ঈরাঙ অসীগী য়েংলগা থাংজীং চীঙজাওদা লৈরিবা ঈবূধৌ থাংজীংগী খুভমদা মৈতৈশিংনা লাই খুরুম্বা অমসুং লাইগী থৌগল তৌননবা চঙবা য়াহন্দনা লৈরকখ্রবা মতূঙদা মমাঙগী বি জে পিগী লৈঙাক অমদি প্রসিদেন্ট রুল লৈঙাক্না ওর্দরশিং থোক্তুনা চঙবা য়াননবা খঙহনখ্রবসু মরী লৈনবা ওফিসিয়েলশিংনা থৌশাদবদগী ঙসীফাওবা মফম অসিদা মৈতৈশিং চঙবা ঙমদনা লৈরি।
মরম অদুনা চৎলিবা জুলাই থা অসীগী তরা ফাওবগী মনুংদা থাংজীং খুভমদা মৈতৈশিং চঙবা য়াননবা মরী লৈনবা অথোরিটিনা মফম অদুগী অকোয়বদা মতীক চানা সেক্যুরিটি ফোর্স থমদুনা ঙাক-শেনগদবনি হায়বা ৱাফমশিং ৱারেপ ওইনা লৌখি। মফম অদূগী অকোয়বদা লৈরিবা কুকি-জো কম্যুনিটিগী মীওইশিং তকথোকখিগদবনি। মসী থবক ওইনা পাঙথোক্ট্রবদি মথঙগী নুমিৎ জুলাই ১১ দগী মখল-মখা কয়াগী অকনবা খোঙজং চঙশীল্লকখিবনি হায়না ৱারেপ তাখি।