থাজদবা থৌওং খরনা মরম ওইদুনা থা ৯ হেন্না আই এস এসতা পন্থরগা লৈরকখিবা সুনিতা, ৱিলমোর প্রিথীবিদা তেক্ত-কায়দনা হল্লকখ্রে

য়ু এস এগী নেস্নেল এরোনোটিক্স এন্দ স্পেস এদমিনিষ্ট্রেসন (নাসা) গী এষ্ট্রোনোট অনী প্রিথীবিদা অশোয়- অঙাম য়াওদনা হল্লকখ্রে। হৌখিবা থা ৯ ( মাপন) হেন্না য়াম্না থাজররোইদবা মরম খরদগী ইন্টর্নেস্নেল স্পেস ষ্টেসন ( আই এস এস) দা পন্থরগা লৈরকখ্রবা মতূঙদা প্রিথীবিদা য়ৌরকখ্রবা অমেরিকান এষ্ট্রোনোট অনী অদূদি ইন্দিয়ান ওরিজিন য়ু এস এষ্ট্রোনোট সুনিতা ৱিল্লিয়ম অমসুং বটস ৱিলমোর হায়রিবা এষ্ট্রোনোট শিং অসিনি। এষ্ট্রোনোট অনীদু হৌখিবা য়ূমসকৈশা নুমিৎকি অঙনবা অয়ূক, পুঙ ৩.২৭ ( আই এস টি) তাবা মতমদা প্রিথীবিদা থুংলখিবনি।

স্পেস এক্স দ্রাগোন ফ্রিদম কেপস্যুল হায়না মিংথোনবা স্পেসক্রাফ্ট অদূ ফ্লোরিদাগী সমুদ্র খোঙবান্দা মায় পাক্না থুংলখিবনি হায়রি। বটস ৱিলমোর অমসুং সুনিতাগা লোয়ননা নিক হগ অমসুং আলেকজেন্দর গ্ৰিবিওনকিনসু প্রিথীবিদা থুংলখি। নিক হগ অমসুং আলেকজেন্দর অনী অসিনা আই এস এস তা পন্থদুনা লৈখ্রবা সুনিতা ৱিল্লিয়ম অমসুং ৱিলমোরবু কন্নবগীদমক মমাঙ চহীগী দিসেম্বর থাদা নাসাগী স্পেস এক্স মিসন মখাদা ইন্টর্নেস্নেল স্পেস ষ্টেসন্দা চৎখিবনি। আই এস এসতা মতম শাংনা পন্থরকখিবদা এষ্ট্রোনোট সুনিতা ৱিল্লিয়মগী হকচাংগী ফীভম য়াম্না শোকচীল্লকপদগী মখোয়বু কন্ননবা অখন্নবা থৌরাংশিং নাসা না লৌখৎলকখিবনি।

মখোয়না মায় পাক্না প্রিথীবিদা থুংলখিবদা স্পেস এক্স মিসন কন্ট্রোলনা তরাম্না ওকখি। মখোয়না হল্লকপদা তোংলক্কদবা বোইং ষ্টার লাইনর অদুগী কেপস্যুলদা য়াওরিবা প্রোপ্যলসন সিষ্টেমদা অশোয়বা খরা য়াওরকখিবদগী এষ্ট্রোনোট অনীদু মতম শাংনা আই এস এস তা লৈথবগী মথৌ তারকখিবনি। মখোয়না লৈরিঙৈ মতমদুদা মবান্নিনা মালেম অসিবু ৪৫০০ রক হন্না কোয়দুনা চৎপা ঙমখি হায়রি।