সস্পেন্দেদ এমিমেসন লৈনা -লৈনা লৈঙাক হেক্তা শেম্বা য়াবা নত্তে: আর কে ইমো

মনিপুরদা চৎলিবা চহী অসীগী হৌখিবা ফেব্রুয়ারি ১২ দগী সস্পেন্দেদ এমিমেসন ( প্রসিদেন্ট রুল) চল্লাইদুনা ঙসী ফাওবা লৈরক্লি।বি জে পিগী এম এল এশিং অসীনা মীয়ামগী লৈঙাক অমা ঙসীফাওবা শেম্বা ঙমদে হায়দূনা পঙলাও-লাউরি অদুবু কন্সটিট্যুসনগী চৎন-কাঙলোন,নিতি-নিয়ম হায়বা অমা লৈরি হায়বসিদি ঈখন – খন্থনদবগী মতৌ অমা উবা ফংলি হায়না এম এল এ ইমোনা ফোঙদোকখ্রে।
চীন্দা ঙাঙথোকখিবদি য়াম্না নুঙাইবা অমসুং অরায়বা অমনি অদূবু থবক্তা ওন্থোক্নবা হোৎনরকপা মতাঙদদি চৎনবা-চৎনদবা, য়াবা-য়াদবা হায়বা ময়াম অমা লৈরিবা মরম্না অরায়বা ওইদে। সস্পেন্দেদ এমিমেসন অসী লৌথোকখ্রবা মতুংদা ষ্টেট লেজিসলেচরগী লুচিংবা খল্লবা মতমদা মীয়ামগী লৈঙাক অমা থম্নবগীদমক মওং চুম্না,কন্সটিট্যুসনগী পথাপ মখাদা মফম-মতম চপ চানা ক্লেম তৌবা তাবনি হায়না আর কে ইমোনা মখাতানা ফোঙদোকখি।
চৎলিবা দিসেম্বর থা অসীগী ২৭ থাঙজা নুমিত্তা মহাক্কি সগোলবন্দ কেন্দ্রগী মনূঙচন্না লৈরিবা সগোলবন্দ নেপ্রম মেঞ্জরদা, হৌখিবা কুমশিং ২০২১ দগী শাবা হৌখিবা অর্বান প্রাইমারি হেল্থ সেন্টর অমা শঙ্গাবগী থৌরমদা অথোয়বা মীথূঙলেন ওইনা শরূক য়াখিবা এম এল এ না ৱাফম অসি ফোঙদোকখিবনি।
হন্দক বি জে পিগী এম এল এশিং দিল্লিদা চত্তুনা সেন্টরগী লুচিংবশিংগা ন্যূ দিল্লিদা ৱারী শান্নরুবা অদূ মনিপুরদা মহৌশাগী ঈঙ-তপ্পা শক্তম,শান্তি হঞ্জিলহন্ননবা য়াম্না মরুওইবা তাঙ্কক অমনি।মমাঙদা চহী অনীগী মতমদগী তঙদূ-লৈতাদবা,হীঙশাগী ঈরাঙ কয়ামরূম নোংমা কাংদনা লৈরম্বদুউ ঙসীদি শীঙথানিঙায় ওইনা হন্থরকখ্রে।লান খূদিঙমক্কি ৱারোয়শিন টেবলদা পুরকখিবা ঙাক্তনি হায়বা ৱাফম এম এল এ ইমোনা ফোঙদোকখি।