সেকমাই কেন্দ্রগী অকোয়বা মফমশিংদা কুকি মিলিটেন্টশিংগী দিজিগনেটেদ কেম্প অমত্তা শাবা য়ারোই হায়দুনা মীয়াম্না প্রোটেষ্ট তৌখ্রে

হৌখিবা কুমশিং ২০২৩ গী মে অহুমদগী মনিপুরদা সেপরেট এদমিনিষ্ট্রেসনগী দাবী তৌদুনা, লমদম অসীগী অপূনবা শক্তম অমসুং ইন্টিগ্ৰিটিদা চাউনা শীঙনরকতুনা হীঙশাগী ঈরাং থোকহন্দুনা মীচম মীয়াম পাক্তক্ননা হাৎখ্রবা অমসুং মীচম কয়া অমনা অশোক- অপন নংহনবগী মথক্তা মীচম লীশিং কয়াগী য়ূম-কৈ মৈনা তুম্না থাদোক্তুনা মীওই লীশিং ৬০ হেন্না লাঞ্জেন্নহন্দুনা হৌজিকফাওবা রিলিফ কেম্পশিংদা অৱাবা খাঙদুনা লৈহল্লিবা কুকি-জো কাঙলূপকি মিলিটেন্টশিংগী দিজিগনেটেদ কেম্প অমত্তা সেকমাই কেন্দ্রগী মনূঙ অমসুং অকোয়বা মফমশিংদা শাদুনা মখোয়বু চঙজফম পীবা য়ারোই।

কুকি-জো কাঙলূপকি মিলিটেন্টশিং অসি মৈতৈ কম্যুনিটিনা খুন্দারিবা মফম খূদিংমক্তগী য়াম্না অরাপ্পা মফমশিংদা পুথোকখিগদবনি হায়বা অকনবা দাবী তৌদুনা সেকমাই কেন্দ্রগী মৈরা পায়বীশিং অমসুং ক্লব ওরগনাইজেসন কয়াগী থৌমীশিংনা অকনবা প্রোটেষ্ট তৌখ্রে।

কেন্দ্র অসীগী মনূঙচন্না লৈরিবা তোঙান তোঙানবা গ্ৰাম পঞ্চায়েট ৫ দগী লাকপা মীয়াম্না অমত্তা ওইনা পূন্দুনা ঙরাং সেঞ্জম চিরাং কম্যুনিটি হোলদা কুকি-জো মিলিটেন্টশিং নেস্নেল স্পোর্টস য়ুনিভর্সিটি লৈরিবা মফম অসীগী মথক্তা লৈবা এরিয়াশিংদা লৈহন্ননবা, মখোয়গী দিজিগনেটেদ কেম্প শাগৎননবা লৈঙাক্না থৌরাং তৌরক্লিবসি কৈদৌনুংদা য়াবা ঙম্লোই, অথূবা মতমদা লৈঙাক্কি থৌরাং অসী হন্দোকখিগদবনি হায়বা দাবী তৌরদুনা অকনবা খোঙজঙ চঙশীনখিবনি। স্পোর্টস য়ুনিভর্সিটি অসী শানবগীদমক শেল অমত্তা খুঞ্জাশিংনা লৌদনা লৈঙাক্তা কত্থোক্তুনা শাহনখিবনি। কুকি-জো মিলিটেন্টশিং কৈদৌনুংদা মফম অসোমদা পুশিল্লকপদি য়ারোই হায়না মৈরা পায়বী লূপকি সেক্রেটরি হৈখাম অমব্রাবতিনা ফোঙদোকখি।