ইম্ফাল নোংচুপ পানাগী মনূংচন্না লাঙ্গোল গেম ভিল্লেজদা লৈবা, সেক্যুরিটি গার্দ ওইনা থবক তৌরিবা নহা অমা থা অসীগী মঙাগী নুংদাং পূঙ ৯ লোম তারকপদা শকখঙদবা খূৎলায় পায়বা মীওইশিংনা মখোঙদা নোংমৈনা কাপ্লম্বদগী অরুবা ফীভমদা শোক্তুনা রিমস হোস্পিটালদা লায়কন্নখ্রে।মহাক জৱাহরলাল নেহরু ইন্সটিট্যুট ওফ মেদিকেল সাইন্সেস (জেনিমস), পোরোম্পাত্তা সেক্যুরিটি গার্দ ওইনা থবক তৌবনি হায়রি। লম্ফেল পুলিশ ষ্টেসনগী মনূংচন্না লৈরিবা লাঙ্গোল গেম ভিল্লেজ রোদতা মহাকপু নোংমৈনা কাপ্তুনা শোকহল্লম্বনি।
কনানা করি মরমগীদমক মহাকপু নোংমৈনা কাপ্লম্লিবনো হায়বদু হৌজিক খঙবা ঙমদনা লৈরি। নোংমৈনা কাপ্লম্বদগী শোক্লবা ক্রিটিঙম্বা লৈশাংথেম (২৮) হৌজিক রিমসকি দাক্তরশিংনা চেকশীন্না শেন্নদুনা লায়েং চত্থরি হায়রি। থৌদোক অসীগী মতাংদা পুলিশ ওথোরিটিনা কেস অমা রেজিষ্টর তৌদুনা থিজিনবা হৌখ্রে।
মনিপুরদা চহী অনীরোম ফারক্কদৌরবা, মীয়াম্না মায়োক্নরিবা হীঙশাগী অকনবা ঈরাং অসীগী চৈরকশিদা অয়ূক-নুংথিল-নুংদাং হায়বা থিদনা মশক খঙদবা খূৎলায় পায়বা মীওইশিংনা মীয়ামদগী শেল মুনবা, শেল য়াওদ্রবসু মী অদূগী মশাদা লোয়নরকপা পোৎ- চৈ মুনবগী থৌওংশিং অসুম অসুম হেঙ্গৎলক্লি। লো লৈত্র বা, মীয়ামগী লৈঙাক চৎত্রবা, ভূৎ প্রেতকি লমদম অমগী মওং-মতৌ অমা মীয়াম্না উবা ফংলক্লি হায়না মায়কৈ কয়াদা ফোঙদোক্নরক্লিবা চৈরক্তা ক্রিটিঙম্বগী থৌদোক অসী থোক্লিবসিনা তাকপদি লমদম অসী অমনা অমবু শেৎ-শেত্তুনা চানরক্লে, মীওইবা মরক্তা নুংশিনবা, ধর্মা হায়বদু লৈরক্ট্রে হায়বনি। মসী য়াম্না কিনিঙায়নি হায়নরক্লি।