সঙাই ফেষ্টিভেল পাঙথোকপা য়ারোই হায়বা মীয়ামগা পুলিসকা মূক্নবদা মীওই কয়া শোক্লে,মহৈরোয়শিং ৱান্থরকপদগী লায়কন্নখ্রে

কোর্দিনেসন কম্মিটি ওন মনিপুর ইন্টিগ্ৰিটি (কোকোমি) অমসুং মনিপুরগী অতৈ তোঙান তোঙানবা সি এস ওশিং,আই দি পিশিং,মহৈরোয়শিং অমদি সোসিয়েল এক্টিভিষ্ট কয়ানা সঙাই ফেষ্টিভেল পাঙথোক্নবা লৈঙাক্কি থৌরাং অসী তৌবিখিগনু মতাং চাদ্রি হায়জরবসু পি আর লৈঙাক অসীনা ঙসীদগী হৌরগা সঙাই ফেষ্টিভেল পাঙথোকপা হৌখ্রে।

রিলিফ কেম্পশিংদা লৈরিবা আই দি পিশিং অমসুং মীয়াম্না পাম্লিবদি অসীগুম্বা, মনিপুরবু মালেমগী মীয়ামদা শক তাক্লিবা ফেষ্টিভেল অসী পাঙথোকপদা মীয়াম্না পামদবা অমত্তা লৈতে, থোইনা হেন্না পূক্নিঙ থৌগৎলি অদুবু হৌখিবা কুমশিং ২০২৩ গী মে অহুমদগী হৌজিকফাওবা হীঙশাগী ঈরাঙনা শোকহনবদগী মীওই লীশিং কয়া লাঞ্জেন্নরগা রিলিফ কেম্পশিংদা লৈরিবা অসী হান্না মশা -মশাগী য়ূমদা হঞ্জিলহনখো,মীয়াম চত্থোক -চৎশীন য়াহন্দনা লৈরিবা নেস্নেল হায়ৱেশিংদা লৈরিবা অথীংবসি হাংদোকখো, মদূগী তুংদা সঙাই ফেষ্টিভেল মপূঙফানা পাঙথোকসি হায়বনি।

লৈঙাক্না মীয়ামগী অনীঙবা অপাম্বা ময়ামসি তাবীদনা সঙাই ফেষ্টিভেল পাঙথোক্ননবা থৌরাং পায়খৎলকপবু কন্না য়ানিংদবা ফোঙদোক্তুনা কোকোমিনা লুচিংদুনা মশীঙ য়াম্লবা মহৈরোয়শিং অমসুং আই দি পিশিংনা ঙরাং ফেষ্টিভেল অসীগী মপূঙ ওইনা পাঙথোকফম ওইরিবা ইম্ফালগী হপ্তা কাঙজৈবূঙদা মায়কৈ কয়াদগী থোমজীল্লক্তুনা খোল্লাউ কয়া লাউদুনা অকনবা প্রোটেষ্ট তৌরকপদগী মীয়াম অদুবু কন্ট্রোল তৌনবগীদমক পুলিসনা লাথী চার্জ তৌখি । মীয়াম অমসুং পুলিসকি মরক্তা য়াম্না চাউনা উংখৎনরকপদা পুলিসনা ত্যার গ্যাস সেলশিং কাপ্পদা মীওই কয়া শোকখি।মহৈরোয় অনী ৱান্থরকপদগী জেনিমসতা পুখত্তুনা লায়কন্নখি অদুগা কোকোমিগী থৌমী অনীসু ফাজীনখি।মখোয় অনীদি কোন্নথংদা থাদোরকখ্রে হায়রি।