রসিয়ানা শাবা মিগ-২১ ফায়টর জেট কায়নবগী থৌরম পাঙথোকখ্রে

হৌখিবা চহী ৬২ চূপ্না ইন্দিয়ান এয়র ফোর্স না লৈবাক অসীগী অতিয়াদা মনীঙ তম্না পাইহন্দুনা অরু-অরুবা লানফম অমদি অখন্নবা ৱার-মিসন কয়াদা মায় পাক্না শীজিন্নদুনা, য়াম্না মরূওইবা থৌদাংশিং লৌদুনা লাকখিবা রসিয়াগী মিকোয়ান-গুরিবিচ না দিজাইন তৌখিবা, সুপরসোনিক জেট ফায়টর অমা ওইবতা নত্তনা ইন্টর্সেপ্তর এয়রক্রাফ অমসু ওইরিবা এম আই জি নত্রগা অশম্বীদা “মিগ” ফায়টর জেট হায়না খঙনরিবা দিফেন্স এয়রক্রাফ অসীবু ইন্দিয়ান দিফেন্স মিলিটরিনা কায়নবগী অরোয়বা বিদাই পীবগী থৌরম অমা ঙরাং য়ুনিয়ন দিফেন্স মিনিষ্টর রাজনাথ সিংহনা অথোয়বা মীথূঙলেন ওইদুনা পাঙথোকখ্রে।
লৈবাক অসীবু য়ূমথঙনরিবা য়েক্নবা লৈবাকশিংনা থেংখাঙ কয়ারক হন্না খৎনবা হৌরক্তুনা, নেস্নেল ইন্টিগরিটি, সেক্যুরিটি অমসুং সোভরেন্টিদা শীঙনরকপগী থৌদোকশিংদা মিগ- ২১ ফায়টর এয়রক্রাফ অসীনা মাঙজীল থানা লৈবাক অসীগী অতিয়াদা অমসুং য়ূম্লোন্নরিবা য়েক্নবা লৈবাক পাকিষ্টানগী লমখৈ মনূঙফাওবা পাইশিন্দুনা ঈমা লৈবাক অসীগী ঈজ্জৎ ঙাক্তুনা লাকখ্রবনি। য়েক্নবা লৈবাকশিংগী লান্মী মশীঙ খঙদনা হাৎখ্রবা ফায়টর মখল অমনি।
চান্দিগর এয়রফোর্স ষ্টেসন্দা মিগ-২১ ফায়টর কায়নবগী থৌরমদুদা ইন্টর্নেস্নেল স্পেস মিসন্দা গ্ৰুপ কেপ্তেন ওইনা চৎলুরবা সুভান্সু শুক্লা, হান্নগী ইন্দিয়ান এয়র ফোর্সকি চিফ এৱাই টিপনিস, এস পি ত্যাগি, বি এস ধনৱা অমসুং আই এ এফকি মকোকথোংবা ওফিসিয়েলশিংসু শরুক য়াখি।কুমশিং ১৯৬৫ অমসুং ১৯৭৩ দা শোক্নখিবা ইন্দো-পাক ৱার, কুমশিং ১৯৯৯ গী কারগিল কনফ্লিক্ট, কুমশিং ২০১৯ গী বলাকোট এয়র ষ্ট্রাইক অসীনচিংবা কয়াদা মিগ- ২১ না য়াম্না চাউনা থৌদাং য়াদুনা লাকখিবনি।