রিজার্ভ ফোরেষ্টকি এরিয়াশিং সেন্টরগী অয়াবা য়াওদনা ষ্টেট নত্রগা য়ু টি এদমিনিষ্ট্রেসনশিংনা কনাগুম্বা অমত্তদা পীথোকপা য়ারোই: সি জে আই

রিজার্ভ ফোরেষ্টকি এরিয়াশিং সেন্টরগী অয়াবা য়াওদনা ষ্টেট নত্রগা য়ুনিয়ন টেরিটোরি এদমিনিষ্ট্রেসনশিংনা কনাগুম্বা লন্নাই মীওই নত্রগা এন্তাইটি অমত্তদা লিজ তৌদুনা অমদি অতৈ মওং অমত্তদা পীথোকখিবা য়ারোই হায়না সুপ্রিম কোর্ট না জজমেন্ট অমা পীখ্রে। করিগুম্বা ফোরেষ্ট কি লম লন্নাই মীওইদা পীথোক্লম্বা তারবসু মদূ ফোরেষ্ট দিপার্টমেন্টদা অমূক হঞ্জিলহন্ননবা খূদক্তা থবক লৌখৎকদবনি।

রিজার্ভ ফোরেষ্ট এরিয়াশিংদা নন-ফোরেষ্ট এক্তিভিটিশিং চত্থদুনা উমংগী লমশিং কোকথোক্তুনা মাঙহনবগী থৌওংশিং লৈব্রা হায়বদু মরী লৈনবা ষ্টেট লৈঙাকশিং অমসুং য়ু টি এদমিনিষ্ট্রেসনশিংনা খূদক্তা অকনবা মীৎয়েং চঙদুনা থিগৎলবা মতূঙদা আইনগী মতূঙ ইন্না অকনবা চৈরাক পীহন্ননবা হোৎনগদবনি হায়না হন্দক চৎলিবা মে ১৪ দগী সুপ্রিম কোর্ট কি চিফ জষ্টিস ওইনা মথৌ তৌবা হৌখ্রবা জষ্টিস বি আর গভাইনা ফোঙদোকখ্রে।

মসিগা লোয়ননা অকনবা দিরেক্টিবশিং ষ্টেট অমসুং য়ু টি এদমিনিষ্ট্রেসনশিংদা থাদুনা খঙহনখ্রে। হৌখিবা কুমশিং ১৯৯৮ দা মহারাষ্ট্র ষ্টেটতা ফোরেষ্ট কি লম অমা লন্নাই মীওইদা পীথোকখিবগী মতাংদা হিয়ারিং চত্থরবা মতূঙদা তাখিবা জজমেন্ট অমদা, হায়রিবা ফোরেষ্ট কি লম অদূ অমুক হন্না ফোরেষ্ট দিপার্টমেন্টদা শিন্ননবা খঙহনখ্রবা মতূঙদা মহাক্না লৈবাক অসীগী ষ্টেট অমসুং য়ু টি এদমিনিষ্ট্রেসনশিংদা দিরেক্টিবশিং পীদুনা খঙহনখিবনি। মহারাষ্ট্রগী ফোরেষ্ট এরিয়া অমা লন্নাই মীওইদা পীথোকখিবগী থৌদোক অদুদা পোলিটিসিয়ানশিং, মতমদুগী মিনিষ্টর অমদি ব্যুরোক্রেট ওফিসার কয়ামরুমসু চেন্নখিবনি।