পি য়ু সি এলগী রিপোর্ট য়ানীংদবা ফোঙদোক্তুনা মহৈরোয় কয়ানা খোঙজঙ চঙশীনখ্রে, রিপোর্টকি কোপি মৈ থাখ্রে

পিপলস য়ুনিয়ন ফোর সিভিল লিবর্টিজ (পি য়ু সি এল) কৌবা, দিল্লিদা বেজ তৌবনি হায়বা লূপ অমনা হন্দক মনিপুরদা থোক্লিবা হীঙশাগী ঈরাং অসী তম্পাক্কি মৈতৈশিংনা ইম্ফাল এরিয়াদা লৈরিবা চিন-কুকিশিংদা কাইহৌরক্তুনা তান্থোক্লুবদগী কুকি- জো কম্যুনিটি না অশাওবা ফোঙদোরক্তুনা লম্মন খুম্নরকপগী থৌদোক অমনি হায়না মসীগী রিপোর্ট অমদা হন্দক ফোঙদোরকখিবা অদূবু খম থেংনা য়ানিংদবা ফোঙদোকখিবগা লোয়ননা ইন্দিজিনস পিপলস ট্রিব্যুনেল গী রিপোর্ট অদূগী কোপিশিং মহৈরোয়শিংনা মৈ থাদুনা অকনবা খোল্লাউশিংগা লোয়ননা প্রোটেষ্ট তৌখ্রে।

মনিপুর কোল্লেজ, তম্ফাসনা গার্লস হায়র সেকেন্দরি স্কুল, ঘনপ্রিয়া কোল্লেজ নচিংবগী মশীঙ য়াম্লবা মহৈরোয়শিংনা লম্বীদা থোক্লক্তুনা খোল্লাউ কয়া লাউদুনা পি য়ু সি এলগী রিপোর্ট অদূ কন্না য়ানিংদবা ফোঙদোকখ্রে। মনিপুর কোল্লেজ ষ্টুদেন্টস য়ুনিয়নগী জেনরেল সেক্রেটরি য়ূম্নাম জোন্সন্না ফোঙদোকখিবা মতূঙ ইন্না, ইন্দিজিনস পিপলস ট্রিব্যুনেল গী রিপোর্ট অদূদা হৌখিবা কুমশিং ২০২৩ গী মে অহুমদগী থোক্লিবা হীঙশাগী ঈরাং অসী ইম্ফাল এরিয়াদা লৈরিবা চিন-কুকিশিংদা মৈতৈশিংনা ভিক্তিমাইজ তৌদুনা হীঙশা তৌদুনা তান্থোকপা হৌরকপদগী চুরাচান্দপুর, কাংপোকপীনচিংবা মফমশিংদা কোন্নথংদা ঈরাং শন্দোরকখিবনি হায়না ফোঙরক্লবসি নমথাক্নি, কুকি- জো মিলিটেন্ট শিংনা ঈন্সীল্লগা ফোঙদোকহনবা তাৎকি রিপোর্ট অমনি হায়খি।

চীঙদা লৈরম্বা মৈতৈশিংদি মশা-মশানা মরাল য়াজদুনা ইম্ফাল লোমদা চেন্থোকখিবনি হায়না রিপোর্ট অসীদা ফোঙদোরক্লিবসি কুকি- জো কম্যুনিটিনা সেপরেটিষ্ট মূভমেন্ট শাগৎলিবা ঈহৌ অদূ জষ্টিফাই তৌননবা হোৎনবনি, য়ূম্ফম য়াওদবা রিপোর্ট অমনি হায়খি। পিয়ুসিএলগী রিপোর্ট মীয়াম্না য়াবা ঙম্লোই, পি আর লৈঙাক্না লূপ অসী অকনবা চৈরাক পীয়ূ, লূপ অসীনা ফোঙখিবা অরানবা রিপোর্ট অদূগীদমক মনিপুরগী মীয়ামদা লাল্লে হায়জগদবনি হায়না থাবা প্লেকার্দশিং মহৈরোয়শিং অদূনা শীজিন্নখি।