প্রাইম মিনিষ্টর নরেন্দ্র মোদিনা মনিপুরগী ওন্ট্রপ্রিনিয়র অহুমদা থাগৎপা ফোঙদোকখ্রে

হৌখিবা কুমশিং ২০১৪ দগী লৈবাক অসীগী প্রাইম মিনিষ্টর ওইনা ঙসীফাওবা লৈরক্লিবা নরেন্দ্র মোদীনা থা খূদিংগী অরোয়বা নোংমাইজিং নুমিৎতা মীয়ামদা পীদুনা লাকখিবা মহাক্কি পূক্নীঙগী ৱারোল,চৎলিবা দিসেম্বর থা অসীগী ২৮ নোংমাইজীং নুমিত্তসু থম্লকখিবগা লোয়ননা মনিপুরগী ওন্ট্রপ্রিনিয়র অহুমদা থাগৎপা ফোঙদোরকখ্রে।
হৌখিবা নোংমাইজিং নুমিৎকি মহাক্কি মনকি বাট থৌরম অদূনা চৎলিবা চহী ২০২৫ গী ওইনসু প্রাইম মিনিষ্টরগী অরোয়বা পূক্নীঙগী ৱারোল ওইখ্রে।
মনিপুরগী মৈতৈ কাঙলূপ্তগী মোইরাংথেম শেথ না সোল্লর পেনেল ইন্সটোল তৌদুনা, ইলেক্ট্রিক কি মৈ ফংদনা লৈরিবা খুঙ্গংশিংগী য়ূমথোঙ চা কয়াদা মৈ ফংহল্লিবা থৌওং অদুবু প্রাইম মিনিষ্টরনা ঙমখৈ লৈতনা থাগৎখি।মীওইবনা তৌরগে খন্দুনা,অচেৎপা পূক্নীঙগী ফিরেপ অমগা লোয়ননা হনবা নাইদনা থবক পাঙথোক্লবদি মায় পাক্তবা অমত্তা লৈতে হায়বদু মোইরাংথেম শেথ না মালেমগী মীয়ামদা থবক ওইনা ঊৎপা ঙম্লে হায়না প্রাইম মিনিষ্টর না ফোঙদোকখি।
চুরাচান্দপুর দিষ্ট্রিক্টকি মনূঙচন্না লৈরিবা,উ-ৱাদগী লৌবা পোৎলম অমদি মচাকশিংনা হেন্দিক্রাফ কি ওইবা পোৎলমশিং পুথোক্তুনা মশানা মশাবু থবক পীজবগী মথক্তা অতোপ্পা মীওই কয়াদসু থবক পীদুনা শেন্থোক হেনগৎহন্নবা হোৎনরিবা মারগরেট রামথরসিম্বু প্রাইম মিনিষ্টর নরেন্দ্র মোদিনা ঙমখৈ লৈতনা থাগৎপা ফোঙদোকখি। মথঙদা, সেনাপটি দিষ্ট্রিক্টতা লৈবা চোংখোনে ক্রিচেনা কৌবি নূপী অমনা মহৌশাগী ওইবা লৌশিং শীজিন্নদুনা মখল কয়াগী লৈ পাম্বীশিং থাদুনা মালেমগী তোঙান তোঙানবা কৈথেলশিংদা ফংহনবগীদমক প্রাইম মিনিষ্টরনা থাগৎখি।ক্রিচেনা না মীওই কয়াদসু থবক পীদুনা অনৌবা আসা পীবা ঙম্লি হায়না মহাক্না অপেনবা ফোঙদোকখি।