হৌখিবা চহী ২০২৪ গী জানুয়ারি ১৭ তা তেংনৌপল দিষ্ট্রিক্টকি মোরেদা মনিপুর পুলিস কম্মান্দোগী পার্সনেল অনী হাৎখিবা থৌদোক্তুদা হকথেংননা চেন্নবনি হায়দুনা নেস্নেল ইনভেষ্টিগেসন এজেন্সি (এন আই এ) না তোঙান তোঙানবা কেস অনী লৌখত্তুনা এফ আই আর চল্লবা মতূঙদা ফাগৎলকখিবা, থৌদোক্তুদা হকথেংননা চেন্নবনি হায়বা কুকি ঈনপী মনিপুরগী স্পোক্সপর্সন থাংমিনলেন মাতেবু গৌহাটি হায় কোর্টনা বেল পীরদুনা থাদোকখ্রে।
এন আই এনা অনলোফুল এক্তিভিটিজ (প্রিভেন্সন) এক্ট, য়ু এ পি এগী মখাদা কেস রেজিষ্টর তৌদুনা ইনভেষ্টিগেসন চত্থরকখ্রবা মতূঙদা গৌহাটি হায় কোর্টতা রিপোর্ট লানখৎলকখিবনি। কেস অদূদা ৱাইখোম রোহিট কৌবা মৈতৈ ফূরূপকি মীওই অমসু চেন্নৈ হায়বা ৱাফম লৈখিবনি।
চপ মান্নবা থৌদোক অমখক্কি মতাঙদা তোঙান তোঙানবা কেস অনী লৌখত্তুনা, এন আই এ না থাংমিনলেন মাতে অসী কেস অনীমক্কা মরী লৈননা ফাগৎলকখিবনি। অদূম ওইনমক গৌহাটি হায় কোর্টকি জষ্টিস মাইকেল জোথাংখুমা অমসুং জষ্টিস আঞ্জম মোনি কালিটা অনীগী বেঞ্চনা ফোঙদোকখিবা মতূঙ ইন্না, কুমশিং ২০২৪ গী জানুয়ারি ১৭ তা মনিপুর পুলিস কম্মান্দো পার্সনেল অনী হাৎখিবা থৌদোক্তুদা এন আই এনা কনাগুম্বা মীওই অমত্তগী মমিং-মথা পল্লকখিবা লৈতে। শকখঙদবা কুকি মিলিটেন্ট শিংনা পুলিস কম্মান্দো পার্সনেল অনী হাৎখিবনি হায়বগী চিংনবা লৈ হায়বা ৱাফমখক্তমক পল্লকখিবনি হায়না থমখি। মসীগা লোয়ননা থাংমিনলেন মাতেবু বেলদা থাদোক্নবগী অয়াবা পীখি।