প্লাষ্টিক পোল্যুসন্না মীওইবা খুন্নাইদা পীরক্লিবা চৈথেঙগী মতাঙদা মীয়ামদা খঙহন্ননবা পাউজেল পুবা সাইকল রেল্লি পাঙথোকখ্রে

ৱারল্ড এনভাইরোনমেন্ট ডে-২০২৫ অসী মালেমগী ওইনা চহী খূদীঙগী জূন থাগী মঙাদা পাঙথোকপনি। মনিপুরগী ওইনা হৌখিবা জূন ১ দগী ঙরাং জূন ৩০ ফাওবা থাবূম অমা চূপ্না প্লাষ্টিক্না মীওইবা খুন্নাইদা পীরক্লিবা তমথিরবা চৈথেং কয়া অসীগী মতাঙদা পূন্না ৱাখল তামীন্নবগী থৌরম কয়ামরুম পাঙথোক্তুনা লাকখি।

প্লাষ্টিক পোল্যুসন মায়থীবা পীশী হায়বা থিমদা হন্দক চহীগী ওইনা পাঙথোকখিবা এনভাইরনমেন্ট কনবা অমসুং প্লাষ্টিক ৱেষ্টকি পোৎলমশিং তুম্না মাঙহন্ননবা চত্থরকখিবা থা অমগী থৌরম অদূ ঙরাং মপূঙফানা লোইশিনখিবনি। মনিপুর লৈঙাক্কি এনভাইরনমেন্ট এন্দ ক্লাইমেট চেঞ্জনা থৌবূ ওইদুনা পাঙথোকখিবা পালন থৌরমদূ লোইশিনবা নুমিত্তা অয়ূক পূঙ ৬ তাবদগী মীওই ১০০ রোম হেনবনা শরুক য়ারদুনা প্লাষ্টিক পোল্যুসন গী অমাঙবা, মীওইবগী হকশেলদা থোকহল্লক্লিবা মাঙজবশিং খঙমীন্নরসি হায়বা পাউজেল পুরদুনা কিলোমিটর ১৫ শাংনা চৎখি।

সাইকল রেল্লি অদু ইম্ফাল নোংচুপ পানাগী শীঙজমৈ চীঙামখোঙদগী লমথাখি। ঐখোয়না প্লাষ্টিক কি পোৎলমশিং অসী শীজীন্নরবা মতূংদা মফম-মরাঙ খঙদনা লংথোকখিবা, নীঙথীনা মফম চাবদা লোইশিন-খোমজীন্দনা লমজাও- লমহাং তুহাংদা,নোংজু-নুংশা মরক্তা মতম শাংনা লৈরকপদগী মাইক্রোপ্লাষ্টিক ওইনা কায়থরকই। মসিনা ঐখোয়গী চীঞ্জাকশিংদা অমসুং শ্বর হোঞ্জিনবদা চঙখ্রগা ঈগী খোঙজেলদা য়াওরকপদগী ঐখোয়গী হকশেলদা চাউনা শোকহল্লি হায়না থৌরমদা শরুক য়াখিবা এনভাইরনমেন্ট এন্দ ক্লাইমেট চেঞ্জ দিপার্টমেন্ট কি দিরেক্তর দা. টি ব্রজকুমারনা ফোঙদোকখি। থৌরমদুদা আই পি আর গী দিরেক্তর ঙাঙোম উত্তম সু শরুক য়াখি।পাঙথোকখিবা সাইকল রেল্লি অদূগী মরূ ওইবা পাউজেলদি ঐখোয় পূন্না হিংমিন্নসি হায়বসিনি।