কনাগুম্বা ওরগান দোনর অমনা অতোপ্পা মীওই নিপানগী পুন্সি কনবা ঙম্মি হায়বসি য়াম্না চুম্লবা ৱাফম অমনি। ঐখোয়না শিরবা মতূঙদা ঈশাগী ওরগান দোনেট তৌরম্বগী হৈনবী লৈশি। ওরগান দোনেট তৌবা ঙম্বগীদমক ঐখোয় ঈশা-ঈশানা চাউথোকচবা পোক্কদবনি হায়না দা. সুজেটানা ফোঙদোকখ্রে।
ঙরাং ইম্ফালদা লৈরিবা হোটেল ইম্মোলেস তা জিবন সঞ্জিবানি অভিয়ান হায়বা থিমদা ষ্টেটকি থাক্তা পাঙথোকখিবা ১৫ শুবা ইন্দিয়ান ওরগান দোনেসন দে গী থৌরমদা শরুক য়াখিবি ষ্টেট ওরগান এন্দ টিস্যু ট্রান্সপ্লান্ট ওরগনাইজেসনগী দিপ্যুটি ষ্টেট নোদেল ওফিসার ওইনা লৈরিবী অসীনা ওরগান দোনেট তৌবনা মীওইবা খুন্নাইদা পীরিবা কান্নবা কয়াগী মরমদা শুগাইবা ৱারোল কয়ামরুম থমখি।থৌরমদুদা অথোয়বা মীথূঙলেন ওইনা শরুক য়াখিবা ষ্টেট লৈঙাক্কি হেল্থ সার্বিসেস দিপার্টমেন্টকি দিরেক্তর দা. চম্বো গোনমৈনসু ওরগান দোনেট তৌবনা মীওইবগী পুন্সি কনবদা লৌরিবা মরুওইবা থৌদাং কয়াগী মরমদা ফোঙদোকখি।
দিরেক্তরেট ওফ হেল্থ সার্বিসেস মনিপুরনা শীন্দুনা পাঙথোকখিবা থৌরমদুদা হেল্থ সার্বিসেস দিপার্টমেন্ট কি দিরেক্তরনা মখা তানা হায়, মীওইবনা শিরবা মতূঙদা পূকচেল চাউনা মহাক মশাগী কিদনি, কোর্নিয়া, অতৈ হকচাঙগী মরুওইবা ওরগানশিং দান তৌরমদুনা মীওইবা খুন্নাইগী পুন্সি কন্ননবা থবক তৌরম্বা হায়বসি চাউথোকচনিঙায়নি অদূগা য়াম্না ফিদম্নফম ওইবা অমসুং মীওইলক্তগী মীথোয়-মীহেল্লবা, গুন কয়ানা লৈতেংলবা, মপোক অসীদা হিংদুনা লৈরম্বগীদমক মহয় য়াল্লবা মীশক্নি হায়না ঐখোয়না শীঙথানরিবনি হায়খি। ওরগান দোনেট তৌবনা খুন্নাইগী মীয়ামদা পীরিবা কান্নবশিং মীয়ামদা পাক-সন্না খঙহন্ননবা এৱের্নেস পীবগী তঙায়ফদবা লৈরি হায়না দিরেক্তরনা ফোঙদোকখি।