নূপী-অঙাঙ, মচল- মচেগী পুন্সি কনবা ঙমদ্রবা সি এম ফম থাদোক্লো: নূপী সমাজ

মনিপুরদা মমাঙ চহীগী মে অহুমদগী কুকি মিলিটেন্টশিংনা চত্থরক্লিবা হীংশাগী ঈরাং অসীদা নূপী- অঙাঙ কয়া য়াওনা মৈতৈ ফূরূপকি য়ূম্বীরেল ওইরক্কদৌরিবা মমল য়াম্লবা নহারোল কয়াগী পুন্সি মাঙহনখ্রে। ঙসী-ঙসীমকসু চিন- কুকি- নার্কো- টেরোরিষ্টশিংনা নূপী অহুম অমসুং অঙাঙ অহুম-পূন্না মীওই তরুক ফাজিনখিবদগী অঙাঙ অমা য়াওনা মীওই অহুমগী অশীবা হকচাং ফংখ্রে। নূপী অঙাঙ য়াওনা মীয়ামগী পুন্সি অমসুং লন-থুম ঙাকপা ঙমদ্রবা মনিপূরগী চিফ মিনিষ্টর নোংথোম্বম বিরেন অমসুং মহাক্কি লৈঙাক অসী মতম চারিঙৈদা ফম থাদোকহৌবনা অচূম্বা খোঙথাঙ ওইগনি। মদূ নত্রবদি খোয়শাওনরবা মীয়ামগী অশাওবগী মৈরিশিং মখোয়গী কোকথক্তা হৈথরকপা শোয়দ্রবনি হায়না মনিপুরগী মরূওইবা ঈমা লূপশিংগী মায়কৈদগী ফোঙদোরক্লি।

ঙরাং নুমীৎয়ুংবা মতূং পূং ১ রোম তারকপদা লম্ফেলদা লৈরিবা ওল মনিপুর ৱিমেন সোসিয়েল রিফোর্মেসন এন্দ দেভলপমেন্ট সমাজ ( নূপী- সমাজ) গী ময়ায় লোয়শঙদা পাঙথোকখিবা পাউমীশিংগা উনখিবা থৌরমদা অপূনবা মনিপুর কনবা ঈমা লূপ ( এমকিল) গী লূচিংবী ঈমা লৌরেম্বম ঙানবীনা হায়, অদূঙৈ কুমশিং ১৯৮০ গী মতমদগী মালেমগী মীয়াম্না ব্লেক লো অমনি, মীওইবা মরক্তা চৎনহনবা য়াদবা লো অমনি হায়দুনা অথীংবা থমখ্রবা আর্ম ফোর্সেস স্পেসিয়েল পৱার্স এক্ট ( আফস্পা), ১৯৫৮ হায়রিবা হিংচা- য়াইতম্বা লো অসী থমজিন্দুনা লাকখিবদগী মমল য়াম্লবা ঈচা- ঈশূ, নূপী- অঙাঙ কয়া মশীঙ খঙদনা হাৎখ্রে।

ঙসিসু অমুবা আইন অসী তম্পাক্কি পুলিস ষ্টেসন তরুক্না কোনবা মফমশিংদা দিষ্টর্ব এরিয়া ষ্টেটস থমজিল্লক্লিবসি মনিপুর লৈঙাক য়াম্না শোল্লি হায়বা তাকপনি হায়খি।  মীয়ামগী পুন্সি অমসুং লন- থুম ঙাকপা ঙমদ্রবা তারবদি খূদক্তা ফম থাদোকহৌবনা অচূম্বা খোঙথাঙ ওইগনি হায়খি। তোঙান তোঙানবা ঈমা লূপশিং পাউগী মীফমদুদা শরুক য়াখি।