এন আর সি খূদক্তা অপদেট তৌগদবনি হায়দুনা লিলোংদা ৱাকৎ মীফম চত্থখ্রে

কেম্পেইন ফোর জষ্ট এন্দ ফ্যের দিলিমিটেসন (জে এফ দি), ওল মনিপুর মুস্নিম ষ্টুদেন্টস ওর্গানাইজেসন (অম্মসো) অমদি য়ুনাইটেদ মৈতৈ পাঙল কম্মিটি (য়ু এম পি সি) না পূন্না খূৎশম্নদুনা ঙরাং লিলোং বাজারদা লৈবা ঈমা কৈথেলদা এন আর সি খূদক্তা অপদেট তৌগদবনি, সেন্সসকি থবক থৌরম অমত্তা এন আর সি অপদেট তৌদ্রিঙৈদা চত্থরকপা য়াখিরোই, সেন্সস তৌদ্রিঙৈ মমাঙদা আই দি পিশিং হান্না খুন্দা-লৈতাহল্লু হায়বা দিমান্দ তৌরদুনা ৱাকৎ মীফম চত্থখ্রে।

লিলোং মায়কৈগী মশীঙ য়াম্লবা মৈতৈ পাঙলশিংনা শরূক য়ারদুনা পাঙথোকখিবা ৱাকৎ মীফম অদুদা জে এফ দিগী কনভিনর জিতেন্দ্র নিঙোম্বা, য়ূ এম পি সি মনিপুরগী প্রসিদেন্ট অমসুং জে এফ দিগী থৌমী মৌলানা মুহৈয়ুদ্দিন, চান্দেল নাগা পিপল্স ওর্গানাইজেসন (সি এন পি ও) গী ৱার্কিং প্রসিদেন্ত অমসুং জে এফ দিগী থৌমী ট্রিমসন মরিং শাকা, য়ূ এম পি সিগী জেনরেল সেক্রেটরি মোহম্মদ রয়িস অহম্মদনচিংবা মীওইশিং শরুক য়াদুনা ৱা ঙাঙখি।

মনিপুরদা নোংমা কাংদনা লোন্না অমদি আইনগী ৱাংমদা মীতোপ কয়ামরূম চঙশীল্লক্তুনা লমদম অসীগী দেমোগ্ৰাফি, কলচর, ইন্টিগ্ৰিটি অমদি নুংশি-চানবগী শক্তমদা শীঙনরক্লিবা কয়া অসী হান্না য়েংশিন্দুনা, লৈঙাক্না মীতোপশিং অসী এন আর সি অপদেট তৌদুনা  খন্দোক্তুনা মশাগী মরমদমদা হলহনখিগদবনি। মখোয়শিং অসী হলহন্দ্রিঙৈদা সেন্সস পাঙথোক্নবা হোৎনরকপা অসি মনিপুরগী য়েলহৌমীশিংনা কৈদৌনুংদা য়াবা ঙম্লোই, মীতোপ খন্দোক্ট্রিঙৈদা সেন্সস চত্থখ্রবদি ঐখোয়গী অপূনবগী শক্তমদা অমদি ষ্টেট অসীগী তুংগী ইন্টিগ্ৰিটি দা অকায়বা কয়ামরুম লাক্কদবা মরম্না এন আর সি হান্না তৌগদবনি হায়না য়ূ এম পি সিগী জেনরেল সেক্রেটরি রায়িস অহম্মদনা ফোঙদোকখি। কুমশিং ১৯৫১ দা বেজ ইয়ার ওইরগা এন আর সি তৌগদবনি হায়বসি মনিপুর মীয়ামগী লেঙদ্রবা, হোংবা লৈররোয়দবা দিমান্দ নি হায়না মহাক্না মখা তাখি।