এন পি পিগী নেস্নেল প্রসিদেন্ট কোনরাদ সংমা নুমীৎ নিনীগী খোঙচত্তা ঙসী ইম্ফালদা লাক্লগনি

মেঘালয়াগী চিফ মিনিষ্টর ওইবতা নত্তনা নেস্নেল পিপলস পার্টি (এন পি পি) গী প্রসিদেন্টসু ওইরিবা কোনরাদ সংমা ঙসী এয়র ইন্দিয়াগী ফ্লাইট তোংদুনা ইম্ফালদা নুমিৎ নিনীগী খোঙচত্তা থুংলরগনি। মহাক্না ইম্ফালগী বির টিকেন্দ্রজিৎ ইন্টরনেস্নেল এয়রপোর্ট তা নুমিৎয়ুংবা মতূঙ মিনিট ৪৫ চৎপদা হেক থুংলবগা খূদক্তা ইম্ফালগী ক্লাসিক হোটেলদা লাক্তুনা তম্পাক্কি সিভিল সোসাইটি ওরগনাইজেসনশিংগী লুচিংবশিংগা উনদুনা মনিপুরদা হৌজিক মায়োক্নরিবা খুদোংচাদবশিংগী মতাঙদা খন্নবগা লোয়ননা মদুগী সোল্যুসন পুরক্নবগী মতাং নৈনগনি।
মদূগী মতূঙ নুংথিল পূঙ ১.৪৫ চৎপদা নাগা কাঙলূপকি সি এস ওশিংগা উনদুনা ৱারী- ৱাতায় তৌনগনি।

মফম অদূদা লঞ্চ লৌরবা মতুঙদা নুংথিল পূং ২.৫০ তাবা মতমদা আই দি পিশিংগা উনবগা লোয়ননা এন পি পিগী মায়কৈদগী পাংবা য়াবা মতেংশিংগী মরমদা নৈনরমগনি হায়রি।নুংথিল পূং ৪ তাবদা গভর্নর অজয় কুমার ভাল্লাগা উনদুনা মনিপুরদা হৌজিক মায়োক্নরিবা লো এন্দ ওর্দর অমসুং অতৈ-অতৈগী মরমদা নৈনবগা লোয়ননা ষ্টেট অনীগী মরক্তা তেংবাং পীননবগী হীরমদা কূপ্না খন্নগনি।

নুংদাৱাইরম পূং ৫ তাবদা পার্টিগী ফঙ্কসন্নরিশিং অমসুং এন পি পিগী এম এল এ শিংগা ক্লাসিক হোটেলদা ফম্মিন্নদুনা, হৌজিক পার্টি অসীগী মনূঙদা লৈরক্লিবা মূক্নবশিং অসীগী মতাঙদা খন্নদুনা সোল্যুসন পুরক্নবা থৌরাং তৌগনি।এম এল এ শৈখ নুরুল হাসন্না এন পি পি মনিপুর লেজিসলেচর পার্টিগী লুচিংবা অমা ওইনা লৈরগা, মীনা বার্টোনসু তৌরক্তবদা বি জে পিগী এম এল এ শিংগী মতূঙ ইন্নদুনা, ফৌমান য়ান্দুনা লৈবা হায়বসি এন পি পিগী ওইনা য়াম্না ঈকায়নিঙায়নি।মহাক্না পার্টী অসীগী ইজ্জৎ খোঙ্গোয়নরে, মতীক চাদবা লুচিংবা অসী খূদক্তা মফম লৌথোক্কদবনি হায়না এন পি পিগী লেজিসলেচর শিংনা অকনবা দিমান্দ তৌরিবনি।