ঙানূকোন্দা বোম পোকখায়রকপদা নূপী অনী শোকপদগী লায়কন্নখ্রে,সি আর পি এফকি বঙ্কর মীয়াম্না থুগাইখ্রে

বিষ্ণুপুর দিষ্ট্রিক্টকি মনূঙচন্না ফৌগাকচাউ ঈখায় পুলিসকি জুরিসদিক্সন মনূঙদা সাইতোন গ্ৰাম পঞ্চায়েটকি ঙানূকোন ৱার্দ নম্বর ৮ দা কুকি -জো নার্কো টেরোরিষ্টশিংনা বোম পোকখায়হনখিবা থৌদোক্তা নূপী অনী শোকপদগী বিষ্ণুপুর দিষ্ট্রিক্ট হোস্পিটাল দা পুখত্তুনা লায়কন্নখ্রে।থৌদোক অদূ ঙরাং অয়ূক থোকখিবনি।অহানবগী থৌদোক ওইনা অয়ূক পূঙ ৫.৪০ রোম তারকপদা থংনা-থংননা বোম অনী পোকখায়রকখি অদূগা অয়ূক পূঙ ৮.৩০ রোম তাবদসু অহূম্লকশুবা বোম পোকখায়বগী থৌদোক অমা লৈখি। অহূম্লকশুবা বোম পোকখায়বগী থৌদোক অদূদা নূপী অনীদু বোম মচেৎশিংনা পানবদগী শোকখিবনি হায়রি।
শোক্লবশিং অদূদি সাইতোন মখা লৈকায়দগী সোইবম সনাতোম্বি (৫২)অপোকপগী মমীঙ এস অঙৌবী অমসুং সাইতোন হয়াইকোন মনীং লৈকায়দগী নোংথোম্বম ইন্দুবালা (৩৭) মপূরোইবগী মিং লৈখিদ্রবা বিসোর্জিৎনি।মফম অদূ সি আর পি এফকি পার্সনেলশিংনা ঙাক-শেন্দুনা লৈবনি।অদূম ওইনমক কুকি -জো মিলিটেন্টশিংগা লৌতূনরগা চত্থখিবা মানবা মওংদা চত্থখিবা থৌদোক অসীগীদমক মায়কৈ অদোমগী খোয়শাওনরবা খুঞ্জাশিংনা সি আর পি এফকি বঙ্কর অদূ থুগাইখি।
অহূমশুবা ওইনা বোম পোকখায়রিবা মফম অদূ হৌজিক লাঞ্জেন্নরগা কৈবুল লমজাওগী রিলিফ কেম্পতা চঙজফম লৌদুনা লৈরিবা সলাম মনি (৭০) কৌবা মীওই অমগী য়ূম মনাক্তনি হায়রি। থৌদোক থোকখিবা মফমদা বিষ্ণুপুর দিষ্ট্রিক্ট পুলিসকি এস পি, আই জি পি,কুম্বি কেন্দ্রগী এম এল এ সনসম প্রেমচন্দ্র নচিংবা লাক্তুনা ফীভম য়েংশিনখ্রে।লূপ কয়ানা ঙরাংগী থৌদোক অদূবু কন্না য়ানিংদবা ফোঙদোক্তুনা ৱাকৎ মীফমশিং পাঙথোক্নবা শেম শাবা হৌখ্রে। অদূম ওইনমক থৌদোক অদূগী মতাঙদা পেন্দবা ফোঙদোক্তুনা ঙসী মনিপুর পূম্বদা শিন্থা লেপ্পগী খোঙজঙ চঙশীনগনি তৌরম্বা অদুদি হন্দোকখ্রে।