নেস্নেল হায়ৱেদা চৎপা য়াহন্ননবা, ফ্লাইট কি মমল হন্থহন্নবা খোঙজঙ চঙশীনখ্রে

থা ২৯ হায়বদি নুমিৎ ৮৮০ শুরক্লবা মনিপুরগী হীঙশাগী ঈরাং অসী সেন্তর লৈঙাক্না লোইশিন্ননবা হোৎনবগী মহূত্তা দিভাইদ এন্দ রুল গেম শান্নরগা লৈরিবসি য়ানিংদে, নেস্নেল হায়ৱেশিংদা মৈতৈ কম্যুনিটি চৎপা য়াদনা লৈরিবসি মতীকচাবা সেক্যুরিটিগী এরেঞ্জমেন্ট  তৌদুনা নীঙ-তম্না চৎথোক চৎশিন তৌবা য়াহল্লু, হায়ৱেশিংদা লমদমসিগী কম্যুনিটি খূদীঙমক চৎপা য়াহনগদবনি অদূগা নেস্নেল  হায়ৱেশিংদা চৎপা য়াদ্রিফাওবা ফ্লাইটশিংগী টিকেট মমল মীয়ামগী য়েংলগা হন্থহল্লু হায়না দিমান্দ তৌরদুনা কৈথেল ফম্বী ঈমাশিংগা লোয়ননা কংলৈপাক কনবা লূপ (কে কে এল) গী থৌমীশিংনা তোঙান-তোঙানবা মফম অনীদা ঙরাং ৱাকৎ খোঙজঙ চঙশীনখ্রে।

নেস্নেল হায়ৱেশিংদা মৈতৈ কম্যুনিটি চৎপা য়াহন্দনা শরঙ মনূঙদা চহী অহুম্লোম ফারক্কদৌরবা মতমসিফাওবদা থমজীনবগী থৌওংশিং সেন্তর লৈঙাক্না চত্থদুনা লাক্লি। ইন্দিয়ানা ফোরেন্নরশিং ঙসী ফাওবসিদা তকথোকখিনবা হোৎনবগী মহুৎ মনিপুরগী য়েলহৌমী মৈতৈশিং তুম্না মাঙহন্ননবা হোৎনরিবসী লাইবক থীবনি হায়না খ্বাইরম্বন্দ কৈথেলদা চত্থখিবা ৱাকৎ খোঙজঙদা শরুক য়াখিবি খ্বাইরম্বন্দ কৈথেল শিনফম অমসুং শক্তম কনবা লূপকি সেক্রেটরি থীঙুজম রানিনা পাউমীশিংদা ফোঙদোকখি।

মতম শাংনা নেস্নেল হায়ৱেদা মৈতৈশিং চত্থোক চৎশীন তৌবা য়াহন্দবসিনা লল্লোন- ইতীক্কি থবক-থৌরমশিংদা চাউনা অকায়বা পীরি হায়না মহাক্না ফোঙদোকখি। জষ্টিস দিলেইদ ইজ জষ্টিস দিনাইদ, মৈতৈগী ঈ চূপ্পা ইন্দিয়া লৈঙাক্কি থৌওং য়াবা ঙম্লোই, দিভাইদ এন্দ রুল পোলিসি খূদক্তা লেপ্পু, টাইমলি জষ্টিস ইজ ট্রূ জষ্টিস হায়বনচিংবা প্লেকার্দ শিং খোঙজঙলোয়শিংনা শীজিন্নখি। মনিপুর হায় কোর্ট কি কমপ্লেক্সতসু কে কে এলগী চপ মান্নবা খোঙজঙ চঙশীনখি।