ম্যান্মারদগী মনিপুরদা কুকি- মিলিটেন্ট ৯০০ চঙশীনখ্রে হায়রিবদু লৈঙাক্না মীয়ামদা শেংদোক্কদবনি এম পি সি সি

হন্দক চিফ মিনিষ্টর সেক্রেটরিয়েত্তগী চিফ মিনিষ্টরগী সেক্রেটরি এন জিওফ্রিনা খূৎয়েক পীদূনা মনিপুর পুলিসকি দি জি পিদা ইবা চেরোল অমা সোসিয়েল মেদিয়াদা ভাইরেল ওইরকখিবা অদুগী মতাঙদা চিফ মিনিষ্টর ওফিসনা মীয়ামদা ময়েক শেংনা অচূম্বা, অশেংবদু ফোঙদোক্তুনা খঙহনগদবনি হায়না মনিপুর প্রদেস কংগ্রেস কম্মিটি (এম পি সি সি) গী ৱার্কিং প্রসিদেন্ট দেবদত্ত খূমন্থেম্না ফোঙদোকখ্রে। চিফ মিনিষ্টর গী সেক্রেটরি এন জিওফ্রিনা সাইন তৌদুনা চাইথোরকখিবা চেরোল অদূনা মনিপুরগী দি জি পিদা খঙহল্লিবসি- হন্দক ম্যান্মাররোমদগী দ্রোণ, প্রোজেক্টাইল, মিসাইল শীজিন্নবদা মপূংফানা ট্রেন তৌরবা অমদি জঙ্গল ৱারফিয়রদা হৈথোই-শিংথোইরবা কুকি- জো কাঙলূপকি মিলিটেন্ট ৯০০ মনিপুরদা য়ৌশিল্লক্তুনা তোঙান তোঙানবা মনিপুরগী পেরিফেরিশিং, চীঙখোঙ-চীঙয়াশিংদা চাইথোক্তুনা লৈরে, মৈতৈদা অকনবা এত্তেক চত্থনবা থৌরাং তৌরি লোয়ননা চৎলিবা সেপ্তেম্বর থা অসীগী ২৮ স্বাইদগী অকনবা এত্তেক চত্থননবা থৌরাং তৌরে হায়বসিনি।

কুকি- মিলিটেন্ট শিং অদূ মেম্বর ৩০/৩০ গী টিম নত্রগা য়ুনিটশিং শেম্লগা চাইথোক্তুনা থমখ্রে, মরম অসীনা সেক্যুরিটিগী অকনবা চেকশিন থৌরাং লৌখৎলু, সেক্যুরিটি ফোর্স শিং থোমজীন্ননবা থবক লৌখৎলু হায়না ফোঙদোরকখিবনি। মদূগী কোপিশিং চিফ সেক্রেটরি, সেক্যুরিটি এদভাইজর অমসুং কম্মিস্নর হোমদসু এন্দোর্স তৌখিবনি। মদূ অচূম্বা অমরা নত্রগা করম তৌবনো হায়বদু মীয়ামদা শেংদোক্তুনা খঙহল্লু হায়না দেবদত্তনা অকনবা ৱাফম ফোঙদোরকখিবনি।

বি জে পিনা লুচিংবা এন দি এ লৈঙাক্কি অহুমশুবা টার্ম অসীগী অহানবা হন্দ্রেদ দেজগী মনূংদা মনিপুরদা থোক্লিবা ঈরাং অসীগী মপূংফাবা ৱারোইশিন পুরক্কনি হায়খ্রবা মতূংদা মদূগীদমক রোদমেপ শেম্বা লোইরে হায়না য়ুনিয়ন হোম মিনিষ্টর অমিট শাহানা হৌজিকখক্তা ইচম চম্না ফোঙদোক্লগা লোইশিনখিবা অসিবুসু দেবদত্তনা পেন্দবা ফোঙদোকখি। ঈরাং অসী লোইশিনবিয়ু হায়না মীয়াম্না তকশীন্দুনা লাক্লি অদুগা অমরোমদনা, হীংশাগী ঈরাং অসী লাকশীন্ননবা কাঙলূপ অনীগী মীহুৎশিং কৌরগা মীফম পাঙথোক্কনি হায়না, হান্নদগী ফোঙদোক্তুনা লাক্লবা, চীনফা পুরবা ৱাফম হঞ্জিন- হঞ্জিন ফোঙদোক্তুনা লৈরিবসি পেন্দে হায়খি। মিলিটেন্ট শিং থেম্ননবা দাইলোগ চত্থগনি হায়রিবসি করি হায়রিবনো হায়না হংখিবগা লোয়ননা কাষ্মিরদা প্রোক্সি ৱার চত্থরক্লিবা হিজবূল মুজাহিদিন অসীসু ৱারী শান্নরগা মখোয়গী দিমান্দ পীবা তারিব্রা হায়না মহাক্না হংখি।