মিজোরামদা লৈরিবা মৈতৈশিং অশোয়- অঙাম য়াওদনা শান্তি ওইনা লৈরি, মিপাইনিঙাই ওইদ্রি

মনিপুরদা মমাঙ চহীগী মে অহূমদগী হৌজিক ফাওবদা চিন- কুকি মিলিটেন্টশিংনা হীংশা কা হেন্না য়াওবা ঈরাং চত্থরক্তুনা মীওই ২২৮ গী মথক্তা হাৎখিবা, মীওই ৬০,০০০ হেনবনা মশাগী মরমদমদা ময়ূম-মকৈ লৈহন্দনা লাঞ্জেন্নহল্লিবা অমদি মীওই লীশীং কয়া অমনা বোম, নোংমৈনা পান্দুনা অশোক- অপন মায়োক্নহল্লিবা অসীগী চৈরক্তা মনিপুরদগী তোঙান তোঙানবা শিনফমদা থবক তৌদুনা অমসুং মহৈ-মশিন তমদুনা মিজোরামদা লৈরিবা মৈতৈ কাঙলূপকি মীওইশিংদা পামদবা থৌদোক অমত্তা থোকপা লৈত্রি, মিজোশিং অমদি অতৈ কম্যুনিটিগী মীওইশিংগা মহৌশাগুম য়াম্না নুংশি-চান্ননা লৈমিন্নরি হায়না ওল মিজোরাম মনিপুরি এসোসিয়েশনগী মায়কৈদগী ফোঙদোরক্লি।

এসোসিয়েসন অসীগী প্রসিদেন্ট দব্লিয়ু গোপেশ্বরনা ঐখোয়গী পাউমীদা ফোঙদোরকপা মতূং ইন্না, থা অসীগী ১৬ কি নুংথিল পূং অনীদা মিজোরাম লৈঙাক্কি হোম মিনিষ্টরগী ওফিস চেম্বরদা এসোসিয়েসন অসীগী মীহুৎশিং, ষ্টেট অদুগী আই জি পিনা লুচিংবা পুলিসকি টিম অমসুং সেন্ট্রেল য়ং মিজো এসোসিয়েসনগী মীহুৎশিং পূন্না ফম্মিন্নদুনা ৱারী শান্নখিবা অমদা, মিজোরামদা লৈরিবা মৈতৈশিং অশোয়- অঙাম থোকহন্দনবা ষ্টেট লৈঙাক্না অকনবা চেকশিন-থৌরাং লৌখৎলি হায়খি।

মথৌ তারবদি মনিপুরি মৈতৈশিংগীদমক সেক্যুরিটিফাওবা পীগনি হায়বগী থাজবা পীরকখি হায়রি। মৈতৈশিংনা ষ্টেট অদুদা মিপাইনিঙাই লৈতে। অমম- অথেঙবা মতমদদি য়ূমদগী লাপ্না চৎথোকপিগনু হায়বা ৱাফম থম্লকখি হায়খি। মনিপুরদসু এগরিকলচর কোল্লেজ, রিমস, জেনিমস অমদি অতৈ সেন্ট্রেল ওফিসশিংদা থবক তৌরিবা মিজোরামগী এমপ্লোয়িশিং অমসুং মহৈরোয়শিংদা খুদোংচাদবশিং থোকহন্দনবা পূম্নমক্না হোৎনবিয়ু হায়বা আপিলসু গোপেশ্বর না তৌরকখি।