মীরৈবাক্তগী লান্দারক্লফাও লৈঙাক্না য়েংদুনা লৈরি, আই আর বি নত্রগা মনিপুর রাইফলগী বট্টালিয়নশিং ঙমখৈ পরীংদা থম্মু: সি এস ওশিং

হৌখিবা মে ৭ তা কামজোং দিষ্ট্রিক্টকি ইন্দো-ম্যানমার ঙমখৈ মনাক্তা লৈবা তাঙ্খুল ফূরূপ্না খুন্দারিবা নম্লি, ৱাংলি অমদি জেট চোরো, হায়রিবা ভিল্লেজ অহূম অসীগী য়ূম-কৈ ঙম্নমক তুম্না মৈ থাদোকখিবা, পোৎ-চৈ কয়ামরুম লুট তৌদুনা পুখিবা অমদি নোংমৈ, বোম্নচিংবা কাপশীল্লক্তুনা মীওই কয়া অশোক-অপন নংহনখিবা অদূ মনিপুর,ইন্দিয়াগা ঙমখৈ লোন্নরিবা ম্যান্মারদা বেজ তৌবা কে এন এ -বিগী কাঙবূনি হায়বসি তশেংনা খঙলবনিনা, হন্দক্কি এত্তেক অসী এক্সটর্নেল এগ্ৰেসন অমনি হায়না সি এস ও লুচিংবশিংনা ফোঙদোকখ্রে।

মসী তশেংনা খঙলিবা মনিপুর লৈঙাক্কি হোম মিনিস্তর গোবিন্দাস কোন্থৌজম্না, মশানা পুরিবা দাইত্য অদূগী মশক খঙনা, মীয়ামগী পুন্সি, মীয়ামগী লন-থুম ঙাক্ননবা থবক পায়খৎনবা হোৎনবগী মহুৎতা, য়াম্না দাইত্যা মশক খঙজদবা মওংদা, খুল অহুমদা চত্থরম্বা এত্তেক অদূ এক্সটরনেল এগ্ৰেসন অমনি হায়বগী ইন্টেলিজেন্স রিপোর্ট অমত্তা লৈতে হায়না ফোঙদোকখিবা ৱাফমদু অঙাং মচাগী মতৌনি হায়না ইন্দিজিনস পিপল্স ফোরম মনিপুরগী চিফ এদভাইজর অসাং কাসরনা ফোঙদোকখি।

ঙরাং অৱাবা মায়োক্নরবা খুল অহুম অদুদা সি এস ওশিংগী টিম অমনা হকথেংননা চত্তুনা য়েংশিনখিবা অমদা অসাং কাসরনা ৱাফম অসী ফোঙদোকখিবনি। অৱাবা মায়োক্নরবা খুঞ্জাশিং অদুদা সি এস ওশিংগী মায়কৈদগী চান্ন-থক্নবা পোৎলমশিংসু য়েন্থোকখি।মফম অদূ য়াওনা ম্যান্মারগা তাইনরিবা মনিপুরগী ঙমখৈ পরীংদা মনিপুর রাইফল্স নত্রগা আই আর বিগী বট্টালিয়নশিং থমলবদি মীরৈবাক্তগী মনিপুরদা লান্দারকপা ঙম্লোই হায়না কাসর না মখা তাখি।