মীওই অনী লৈখিদবগী কেস এন আই এদা শিন্নখিবদু লৌথোকপিননবা সি এমদা তকশীনখ্রে

নুমিৎ খরনিগী মমাঙদা কুকি কাঙলূপকি মীওই অনী চীঙদা শিদুনা লৈরম্লবা মতূঙদা চিফ মিনিষ্টর য়ূম্নাম খেমচান্দনা থৌদোক অদূ নেস্নেল ইনভেষ্টিগেসন এজেন্সি (এন আই এ) দা শিন্নরগনি হায়না লাউথোকখিবগা লোয়ননা ইনভেষ্টিগেসন এজেন্সি অসিদা মনিপুর লৈঙাক্না শিন্নখিবা অদূ হন্দোকপিয়ু,হন্দক ঊখ্রূল অমসুং কামজোং দিষ্ট্রিক্ট তা নাগা অমসুং কুকি অনীগী মরক্তা লৈরিবা উংখৎনবগী থৌওংশিং অসি কুকিশিংনা হান্না কাইহৌরকপদগীনি হায়না তাঙ্খুল কম্যুনিটিগী এম এল এ অহুম অমসুং কাঙলূপ অসীগী সিভিল সোসাইটি ওরগানাইজেসনশিংগী লুচিংবশিংনা চিফ মিনিষ্টরদা পাউদম্লদুনা তকশীনখ্রে।
কুকি কাঙলূপকি খূৎলায় মতীক চানা পায়রবা মিলিটেন্টশিংনা তাঙ্খুলশিং ফাবা, ফূবা,লম্বী থিংজিনবা অমসুং তাঙ্খুলশিংগী য়ূম মৈ থাবনচিংবা কয়া চত্থরক্তুনা খৎনবা হৌরকপদগী থোক্লিবা ঈরাং অমনি।কুকিশিংনা ইম্ফাল -ঊখ্রূল লম্বী থিংদুনা ঙসীফাওবা মনীঙ তম্না,ঙকচাও থেক্তুনা অতৈ কাঙলূপশিংগী মীচম-মীয়াম্বু ওৎ-নৈদুনা লৈরবসু লৈঙাক্না করিগুম্বা মখলগী এক্সন অমত্তা মখোয়গী মথক্তা লৌখত্তনা লৈরি।চৈরকসিদা লৈঙাক অসিনা অশেংবা, অচুম্বা অমত্তা থিগৎপা তৌদনা কুকিগী মীওই অনী শিখিবগী মতাঙদা এন আই এদা শিন্নদুনা ইনভেষ্টিগেসন চত্থহন্নবা হোৎনরিবদু খোঙফম হন্দোকপিয়ু হায়না চিফ মিনিষ্টর দা তকশীনখিবনি হায়না সি এম সেক্রেটরিয়েত্তা চিফ মিনিষ্টরগা উনরুরবা মতূঙদা সি এস ও লুচিংবা অমনা পাউমীশিংদা ফোঙদোকখি।
ঙসী নোংমা -নীনীগী মতমসিদা তাঙ্খুলগী এম এল এশিং, সি এস ওশিং, মনিপুরগী দি জি পি য়াওনা, উংখৎনরিবা মফমশিং অদুদা হকথেংননা চত্তুনা ফীভম য়েংশিনমিন্নরগনি লোয়ননা কুকি মিলিটেন্টশিংনা শেমগৎ-শাগৎলক্লিবা বঙ্করশিং অদুসু লৌথোকহল্লগনি হায়না চিফ মিনিষ্টরনা থাজবা পীরকখ্রে হায়না পাউদমখি।
চিফ মিনিষ্টরগা উনখিবদা শরূক য়াখিবা তাঙ্খুলগী এম এল এশিং অদুদি রাম মুইভা, লৈশিও কৈশীং অমসুং খাসিম ভাসুম্নি।উনখিবা অদুদা ষ্টেট লৈঙাক্কি হোম মিনিস্তর গোবিন্দাস কোন্থৌজমসু শরূক য়াখি।