মীয়ামগী য়াইফনবা থবক পায়খৎপা ঙমদ্রবনিনা এম এল এ ফম থাদোক্লগা ঈংনা-চীক্না লৌ উদুনা লৈবিরো: দেবেন

কেন্দ্র মীয়ামগী থবক থৌরমশিং পায়খৎপা অমত্তা ঙমদ্রবা, রুলিং পার্টিদা লৈরগা অসূক্কি মতীক শোঞ্জরবা লম্লাই কেন্দ্রগী বি জে পিগী এম এল এ ওইনা লৈরিবা রুলিং পার্টিগী কে ঐচ ইবোমচা অসী থম্মোয় শেংনা মোরেল গ্ৰাউন্দা ফম থাদোক্লগা য়াম্না চীঙ- লেম্না লৌ উদুনা ঈংনা লৈবিরো হায়না লম্লাই কেন্দ্রদা মমাঙগী এসেমব্লি মীখলদসু মীরেপ ওইনা লম্বা থেংনখিবা সোসিয়েল ৱার্কর অচোইবম দেবেন্না ফোঙদোকখ্রে।
লম্লাই কেন্দ্রগী মনূঙচন্না লৈরিবা গ্বালতাবি খুঙ্গংগী খুঞ্জাশিংগী য়ূম-কৈ পূম্নমক কুকি মিলিটেন্টশিংনা তুম্না মৈ থাদোকপিখিবদগী লাঞ্জেন্নরক্তুনা ইম্ফাল ইষ্ট দিষ্ট্রিক্ট কি নোঙাদা অমসুং শওম্বুংদা লৈরিবা বিরমঙ্গোল কোল্লেজদা হাংবা রিলিফ কেম্পশিংদা আই দি পি ওইনা চঙজফম লৌদুনা লৈরকপা চহী অনী হেনখ্রে। আই দি পিশিং অসী খুন্দা- লৈতাহন্ননবা কেন্দ্রগী এম এল এ অসীনা মপূঙ ওইবা মথৌদাং লৌদুনা হোৎনফম থোকপনি। লম্লাই কেন্দ্রগী এম এল এ অসী ইচম চম্বা, ওপ্পোজিসন্দা লৈবা এম এল এ অমা নত্তে। মহাক রুলিং পার্টি ওইনা সেন্টর অমসুং ষ্টেট অনীমক্তা লৈঙাক পায়রিবা বি জে পিগী এম এল এ অমনি। তৌগে হায়রবদি মহাক্না পাঙথোকপা ঙম্লোইদবা করিসু লৈতে, থবক তৌদবগী ৱানি হায়খি।
ওপ্পোজিসন কংগ্রেস পার্টিগী এম এল এ কাঙুজম রঞ্জিৎনা মশাগী সুগনু কেন্দ্রগী লাঞ্জেন্নরক্লবা আই দি পিশিংগীদমক মরন্নাই শেনফম পুথোকচরগা লম ফাওবা লৈবিদুনা সুগনু অমসুং শেরৌদগী লাঞ্জেন্নরক্লবা আই দি পিশিং খুন্দা- লৈতাহনবা ঙম্মি। লম্লাই কেন্দ্রগী রুলিং পার্টিগী এম এল এ অসীদি মীয়ামগীনি হায়বা থবক অমত্তা পায়খত্তনা লৈরি। মীয়ামগী থবক তৌবা ঙমজদ্রবা এম এল এ অসী মশানা খঙনা, মোরেল রেস্পোন্সিবিলিটি লৌজদুনা ফম থাদোকপিরো, লৌ উদুনা নুঙাইনা লৈবিরো হায়না দেবেন্না ফোঙদোকখি।