আইন কায়না লম্বীগী নাকন্দা শাজিল্লিবা ষ্ট্রকচর অমদি পৈশিল্লিবা মেটরিয়েলশিং ইভিক্সন দ্রাইব চত্থদুনা তকথোকপা হৌখ্রে

ইম্ফাল নোংচুপ পানাগী দিপ্যুটি কম্মিস্নারগী মায়কৈদগী দিষ্ট্রিক্ট অসীগী মরী লৈনবা মীওইশিং অমদি এজেন্সিশিংদা কয়ারক হন্না ৱার্নিং পীদুনা, লম্বীগী নাকন্দা লৈরিবা ফুটপাটশিংগী মথক্তা আইন কায়না পৈশিন্দুনা থম্লিবা নূঙ, লৈঙোই, চেকতেকশিং লৌথোকখিনবা অমসুং লম হেঞ্জিন্না শাজিল্লক্লিবা দুকান, সেদ, বিল্ডিংনচিংবা লৌথোকখিনবা খঙহনখ্রবসু মরী লৈনবশিংনা মতমচানা ঙাক্না চৎখিদবা অমসুং দিষ্ট্রিক্ট এদমিনিষ্ট্রেসনগী ৱার্নিং চেরোলশিং অমদি পব্লিক নোটিস কয়াদু থৌওইদনা লৈথোক্লুবগী ফোল মশা-মশানা ফংজবা হৌখ্রে।

লৈঙাক্কি ওর্দর ইন্দবশিং, মশাখক্তগী ওইজবা থিদুনা অহোইনদুম মীয়াম্না চৎনরিবা ফুটপাত কি শরুক্তা লম হেঞ্জিন্দুনা দুকান, সেদ, বিল্ডিংনচিংবা শাজিল্লকখিবা মীওইশিং অদুগী মথক্তা লূপা লিশীং অমমম ফাইন থীহনবগা লোয়ননা হৌখিবা জুলাই ১২ দগী হৌরদুনা দিষ্ট্রিক্ট অসীগী মনূঙচন্না লৈরিবা মফমশিংদা ইভিক্সন দ্রাইব চত্থবা হৌখ্রে। ইহান হানবা দিষ্ট্রিক্ট এদমিনিষ্ট্রেসন ইম্ফাল নোংচুপ পানাগী ইভিক্সন দ্রাইব হৌদোকপা ওইনা ইম্ফালগী কৈশাম্পাৎ জঙ্কসন্দগী হৌরগা তিদ্দিম লম্বী পরীংদা মালোম ফাওবদা ইভিক্সন দ্রাইব অদূ চত্থ বা হৌখ্রে।

মথঙদা উরিপোক-কাংচুপ লম্বীগী পরীংদা আইন কায়না পৈশিন্দুনা ফুটপাত মথক্তা লৈরিবা নূঙ-লৈঙোয়, চেকতেক পৈখত্তুনা থম্লিবা অমসুং বিল্ডিংগী অহেনবা শরূকশিং শেমগৎলক্লিবশিং পূম্নমক তখখায়রগনি লোয়ননা দিষ্ট্রিক্ট অসীগী অতৈ মফমশিংদসু মখাতানা থবক অসী চত্থরগনি হায়না দিষ্ট্রিক্ট অসীগী এদ্দিস্নেল দিষ্ট্রিক্ট মেজিষ্ট্রেট জাদুমনিনা পাউমীশিংদা ফোঙদোকখি।ইভিক্সন দ্রাইব অদুদা দিষ্ট্রিক্ট এদমিনিষ্ট্রেসন, রিভিন্যু দিপার্টমেন্ট কি ওফিসিয়েলশিং, মনিপুর পুলিস অমদি সি আর পি এফ পূন্না শরুক য়াখি।জিরিবামগী ওইনসু মরী লৈনবা দিষ্ট্রিক্ট মেজিষ্ট্রেট না জুলাই ১১ দা ইভিক্সন ওর্দর থোকখিবগা লোয়ননা লাক্লিবা জুলাই ১৮ গী নুংথিল পূঙ ৩ ফাওবদা অসীগুম্বা মেটরিয়েলশিং পৈশিন্দুনা মীয়ামগী চৎথোক-চৎশীন তৌবদা অকায়বা পীরিবশিংনা, মশা-মশানা খঙনা লৌথোক্কদবনি হায়না অকনবা ৱার্নিং পীদুনা খঙহনখ্রে।