মীয়ামগী অকনবা প্রোটেষ্ট মায়োক্নবদগী মনিপুরগী গভর্নর ইম্ফাল এয়রপোর্টতগী চোপ্পরদা রাজ ভবন য়ৌশিনখ্রে

থা অসীগী ২০ দা এম এস টিগী বস অমদা তোংদুনা সিরুই ফেষ্টিবেল হৌদোকপগী পাউ লৌবা চৎখিবা লোকেল পাউমীশিংগী টিম অমবু লম্লাই কেন্দ্রগী মনূঙচন্না লৈরিবা গ্বালতাবিদা ইন্দিয়ান মিলিটরিনা খাম্লবা মতূঙদা বস অদুদা মনিপুর হায়না থারিবা ময়েক অদূ লৌথোক্কদবনি হায়না অথিংবা পীরকখিবগী থৌওং অদূগী মায়োক্তা মীয়াম্না অকনবা খোঙজঙ চঙশীল্লক্তুনা, মখাতানা ঈহৌ হৌরক্লি।থৌদোক অদূগী তেকচাক মনিপুরগী গভর্নর অজয় কুমার ভল্লানা পুগদবনি হায়দুনা ঙরাংসু ইম্ফালগী কৈশাম্পাৎ জঙ্কসন্দগী চঙাঙ্গৈদা লৈরিবা বির টিকেন্দ্রজিৎ ইন্টর্নেস্নেল এয়রপোর্ট কি দিপারচর গেট ফাওবা মশীঙ য়াম্লবা নূপীশিং, মহৈরোয়শিং অমসুং কোকোমিগী খোঙজঙবু শৌগৎপা মীয়াম্না হ্যুমেন চেন শেমদুনা প্রোটেষ্ট তৌখ্রে।

মীয়াম্না অকনবা প্রোটেষ্ট তৌখিবা অদূ ন্যু দিল্লিদগী এয়রপোর্ট অসীদা থুংলরগদবা গভর্নর অজয় কুমার ভাল্লাগী মথক্তা চঙশীল্লকখিবনি। মে ২০ দা মরিশুবা মহার রেজিমেন্টনা পাউমীশিংদা চত্থরকখিবা থৌওং অদূ গভর্নরগী য়াথং মতূঙ ইন্না চত্থরকখিবনি। মরম অদুনা গভর্নর মশামক্না মনিপুরগী মীয়ামদা লাল্লে হায়জগদবনি, মদূ নত্রবদি খূদক্তা মনিপুর থাদোক্তুনা চৎখিগদবনি হায়বা দিমান্দ তকশীন্দুনা খোঙজঙদূ মীয়াম্না চত্থরকখিবনি। মনিপুরগী চিফ সেক্রেটরি দিজিপি অমসুং সেক্যুরিটি এদভাইজর অহুম অসীসু খূদক্তা মফমদগী মশা- মশানা মোরেল রেস্পোন্সিবিলিটি লৌজদুনা ফম থাদোক্কদবনি হায়বসি মীয়ামগী দিমান্দনি।

মীয়াম্না মহাকপু ঙাইদুনা লৈরে হায়বা খঙবদগী আর্মীগী চোপ্পর অমদা রাজ ভবনফাওবা চত্তুনা, লৈখাগী লম্বীদা চৎকদবদু থৈদোকখিবনি।গভর্নরনা কংলাদা লৈরিবা হেলিপেদতা থুংলরবা মতূঙ অকনবা সেক্যুরিটিগী চেকশীন থৌরাংগা লোয়ননা রাজ ভবন য়ৌশিনখি। মনিপুরগী গভর্নর অজয় কুমার ভাল্লা অসী রাইজিং নোরথইষ্ট ইনভেষ্টর্স সম্মিট য়াওরুরবা মতূঙ ঙরাং নুংথিল ন্যু দিল্লিদগী ইম্ফালদা হল্লকখিবনি।