মথঙ চহীগী ওক্তোবর অমদগী কাষ্ট সেন্সস য়াওনা মীকোক থীবগী থবক তাঙ্কক অনীথোক্না পাঙথোক্ননবা সেন্টরনা নোটিফিকেসন থোকখ্রে

হৌখিবা কুমশিং ২০১১ দা লৈবাক অসীগী মফমশিং শীন্থুংনা চত্থখিবা পোপ্যুলেসন সেন্সস অদুগী মতূঙদা লাক্কদৌরিবা কুমশিং ২০২৬ কি ওক্তোবর অমদগী হৌরগা লৈবাক অসীগী মফমশিং শীন্থুংনা তাঙ্কক অনীথোক্না পোপ্যুলেসন সেন্সস অমসুং কাষ্ট সেন্সস পাঙথোক্ননবা সেন্টরগী হোম এফ্যের্স মিনিষ্ট্রিনা নোটিফিকেসন থোকখ্রে। হন্দক্কি সেন্সস অসী মায় পাক্না অমসুং য়াম্না তরু-তনানবা মওংদা চত্থনবগীদমক ষ্টাফ লাখ ৩৫ রোম শীজিন্ননবা থৌরাংশিং পায়খৎপসু হৌখ্রে।

লৈবাক অসীগী কা হেন্না উন তাবা অঈঙবা মফমশিং হায়বদি লাদাখ, জম্মু অমসুং কাস্মির, হীমাচল প্রদেস, উত্তরখন্দনচিংবা মফমশিংদনা মথঙ চহীগী ওক্তোবর অমদগী  পোপ্যুলেসন সেন্সস অমসুং কাষ্ট সেন্সস চত্থবা হৌরবা মতূঙদা অনীশুবা তাঙ্কক্না লৈবাক্কি অতৈ মফমশিংদা কুমশিং ২০২৭ কি মার্চ অমদগী পাক-সন্না মীকোক থীবা অমসুং কাষ্ট সেন্সস চত্থগদবনি হায়না মিনিষ্ট্রিগী নোটিফিকেসন অদুদা ময়েক শেংনা ফোঙদোকখি। হন্দক্কি সেন্সস অসীদা মহৌশাগা মান্নদবা মওংদা ইন্যুমরেটর অমদি সুপরভাইজর লাখ ৩৪ গা লোয়ননা অতৈ সেন্সস ফঙ্কসন্নরি লাখ ১.৩ হেন্না দিজিটেল দিভাইসশিংগা লোয়ননা পোপ্যুলেসন সেন্সস অমসুং কাষ্ট সেন্সস পাঙথোকহন্ননবা থৌরাং পায়খৎপা হৌখ্রে।

অহানবা তাঙ্কক্তা হাওস লিষ্টিং ওপরেসন ( ঐচ এল ও) পাঙথোক্কনি। মসিদা মীওইশিংগী য়ূম-কৈগী ফীভম, মরল-মথুম অমসুং চহীগী ওইবা ইনকম্নচিংবগী অকূপ্পা দাতা খোমগৎকনি। অনিশুবা তাঙ্কক্তা মীওইশিংগী দিমোগ্ৰাফিক, সোসিও-ইকোনোমিক, কলচরেল অমদি অতৈ অকূপ্পা মরোলশিংগী দাতা খোমগৎকনি হায়রি।মহৌশাদগী তোঙানবা মওংদা হন্দক্কি অসীদদি মীওইশিং মশা- মশানা মখোয়গী পার্সনেল দিটেলশিং অদূ ওনলাইন্দা থাগৎনবগী খুদোংচাবসু ফংহনগনি হায়রি।