মাসলসা না শীন্দুনা নুমিৎ তরেৎনি চত্থগদবা ৪০-আৱার্স মেদিয়েসন ইন্দক্সন ট্রেনিং প্রোগ্রাম হৌদোকখ্রে

মনিপুর ষ্টেট লিগেল সার্বিসেস অথোরিটি (মাসলসা) না সুপ্রিম কোর্ট অব ইন্দিয়াগী মেদিয়েসন এন্দ কন্সিলিয়েসন প্রোজেক্ট কম্মিটি (এম সি পি সি) গা খূৎশম্নরগা ৪০-আৱার্স মেদিয়েসন ইন্দক্সন ট্রেনিং প্রোগ্রাম অমা থা অসীগী ২৮ দগী হায় কোর্ট অফ মনিপুরগী কমপ্লেক্স তা হৌদোকখ্রে। কন্সেপ্ট এন্দ টেক্নিক্স অফ মেদিয়েসন হায়বা থিমদা পাঙথোকপা হৌখ্রবা ট্রেনিং প্রোগ্রাম অদূ লাক্লিবা ওক্তোবরগী ৪ ফাওবা চত্থগদবনি। প্রোগ্রাম অসীদা জুদিসিয়েল ওফিসার ২০ অমসুং এদভোকেট ৪৫ না শরুক য়ারি।

হায় কোর্ট অফ মনিপুরগী জজ অমসুং হায় কোর্ট লিগেল সার্বিসেস কম্মিটিগী চ্যেরমেন ওইনা ওইরিবা জষ্টিস এ গুনেশ্বর শর্মনা থৌরমদু হৌদোকপগী ৱারোলদা, ঐখোয় মীওইবনা থেংনরিবা ঐখোয় মশেল মরক্তা য়ানদবশিং, মূক্নবা, চয়েৎনবা কয়া অসী শেল য়াম্না তিংহন্দুনা অমসুং মতম চঙনা কোর্টশিংদা কেস থেংনদুনা লৈবা হায়বসি পূক্নিং থৌগৎনিঙায় ওইবা থৌওং ওইদে হায়খি। মহাক্না হায়, ত্রিপুরা অমসুং মনিপুরগী মীওই মশীং অসী হাইরপ মান্নরিবনি অদূবু জুদিসিয়েল ওফিসার মশীংদা য়েংলুরবদি ত্রিপুরানা মনিপুরগী জুদিসিয়েল ওফিসার মশীংগী শরুক অনী ওইরি।

মরম অসীনা জজ মশীং য়াম্না হন্থনা লৈরিবা মনিপুরদা কেস কয়ামরুম লোইশিনবা ঙমদনা পেন্দিংদা লৈরি। মরম অদুনা মীয়াম্ন সু য়ারিবমখৈ শেল তিংদবা অমসুং মতমসু মাঙদনা অথূবা মতমদা ৱারোয়শিন পুরকপা য়াবা মেদিয়েসন প্রোগ্রাম অমসুং লোক অদালৎ নচিংবগী খুদোংচাবশিং লৌহৌনবা হোৎনসি হায়খি। লোক অদালৎনা তাখিবা ওর্দর অমা হায়বসি মখা তানা আপিল চৎপসু য়াদে হায়না জষ্টিস গুনেশ্বর শর্ম না ফোঙদোকখি।