সিভিল ৱার চহী কয়ামরুম মায়োক্নরগা লাকপদগী খম থেংনা অৱা-অনা মায়োক্নবদগী খুন্তাক- লান্সিরবা ম্যান্মারদা হৌখিবা মার্চ ২৮ , ইরাই নুমিত্তা রিচতর স্কেলদা মেগনিচ্যুদ ৭.৭ য়ৌনা য়ুহার হাখিবদগী মীওই ২৭০০ কি মথক্তা শিখিবা অমসুং লম্বী-থোং, বিল্ডিংশিং মাঙ-তাকখ্রবা, পৱার লাইননচিংবা অমসুং কম্যুনিকেসনগী লাইন পূম্নমক থদৎখ্রবা ম্যান্মারদা মীরৈবাক্কি পাউমীশিং চঙলগা য়ুহার হাবগী অপদেটেদ ওইবা ঈ-পাউ খোমদুনা রিপোর্ট তৌবগী থবক থৌরমশিং জুন্তা রিজিম্না অথীংবা থমজিনখ্রে।
ম্যান্মারদা বেজ তৌবা অমসুং জুন্তা লৈঙাকপু শৌগত্তুনা রিপোর্টিং তৌরিবা মেদিয়া হাওস পূম্নমক্তদি অথিংবা অসী চৎনরোই হায়না জুন্তা রিজিমগী স্পোক্সমেন ওইনা লৈরিবা মেজর জেনরেল জো মিন টুন না ভোইস মেসেজ অমগী খূত্থাঙদা রিজিম অসিবু শৌগৎপা মেদিয়া প্লেটফোর্ম শিংদা খঙহল্লকখিবনি হায়রি।
এক্কোমোদেসনগী, পৱার আউটেজ, ঈশীঙ ফংলক্তবগী খুদোংচাদবশিং মায়োক্নরগা লৈরিবা অমসুং রিজিমগী ওফিসিয়েলশিংনা হৌজিকমক্কি ওইনা রিলিফ অমদি রেসক্যু ওপরেসনগী থবক-থৌরমশিংদা কা হেন্না মথৌ চিল্লিবা পূম্নমক অসীনা মরম ওইরগা মপান্দগী লাকপা মেদিয়া পার্সনশিংগী লৈফম-চাফম থৌরাং তৌবদা খুদোং চারোইদবা মরম্না অসীগুম্বা অথিংবা অসী থম্বনি হায়না স্পোক্সমেন অসিনা মখাতানা ফোঙদোকখি।