মনিপুরদা শেল-থুমগী ফীভম ফত্রবসু সেকমাই কেন্দ্রগী ওইনদি মীয়ামগী মপূঙফাবা সপ্পোর্ট কা লোয়ননা দেভলপমেন্ট পুরকপা ঙম্লি: দিঙ্গো

মনিপুরদা হৌখিবা কুমশিং ২০২৩ গী মে থাগী অহুমদগী ঙসিফাওবদা কুকি- চিন নার্কো- টেরোরিস্ট শিংনা হীঙশাগী ঈরাং চত্থরকপদগী শেল- থুমগী অমসুং লো এন্দ ওর্দরদা খুদোংচাদবা কয়া মায়োক্নহন্দুনা লৈবদগী ষ্টেট অসীদা চাওখৎ থৌরাংগী প্রোজেক্ট শিং পায়খৎনবা হোৎনবদা খুদোংচাদবা কয়ামরুম মায়োক্নজরবসু সেকমাই কেন্দ্রগী ওইনদি মীয়ামগী মপূঙফাবা সপ্পোর্ট কা লোয়ননা দেভলপমেন্ট পুরকপা ঙম্লি হায়না হান্নগী মিনিষ্টর অমসুং সেকমাই কেন্দ্রগী এম এল এ হৈখাম দিঙ্গোনা ফোঙদোকখ্রে।

ঙরাং মহাক্কি সেকমাই কেন্দ্রগী মনূঙচন্না লৈরিবা লোইতাং খূনৌদা কম্যুনিটি হোল অমগা লোয়ননা ক্লবকি বিল্ডিং অমসু শঙ্গাখিবা থৌরমদা অথোয়বা মীথূঙলেন ওইনা শরুক য়ারদুনা মীয়ামদা ৱা ঙাঙবদা এম এল এ না ৱাফম অসী ফোঙদোকখিবনি। মহাক্না মখাতানা হায়, সেকমাই কেন্দ্রগী মীয়াম্না মহাকপু নুংশিবিবা অমদি মপূঙফাবা সপ্পোর্ট কয়ামরুম লেপ্তনা পীবীবদগী মহাক্না কেন্দ্রা অসীদা মথঙ-মথঙ মীয়ামগী চাওখৎ থৌরাংগী প্রোজেক্ট শিং পায়খৎপা ঙমজরক্লিবনি।

ইম্ফাল নোংচুপ পানাগী মনূঙদা হন্দক্কি হীঙশাগী ঈরাং অসিনা খ্বায়দগী চাউনা চৈথেং পীখিবা মফমদি সেকমাই কেন্দ্র অসীনি হায়খি। মহাক্না কেন্দ্র অসীদা ঈমা মার্কেট অনী মমাঙদা শঙ্গারদুনা কেন্দ্রগী মীয়ামদা খূৎশিন্নখ্রে। সেকমাই দা এষ্ট্রো টরফ অমসু শেমগৎপা ঙমখ্রে। সেকমাই-খুরখুল শম্নরিবা রোদ অসিসু শেমজিন- শাজিনবগী অকনবা থবক হৌজিক-হৌজিক পায়খৎলক্লি অদূগা মখাতানা অতৈ প্রোজেক্ট কয়াসু পায়খৎনবা থৌরাংশিং লেপ্তনা লৌখৎলক্লি হায়খি। থৌরমদুদা ফূম্লৌ গ্ৰাম পঞ্চায়েটকি চ্যেরপার্সন, ময়াংলাংজিং জিল্লা পরিষদকি মেম্বরনচিংবা মীওই কয়াসু শরুক য়াখি।