য়ুনিয়ন হোম মিনিষ্টর অমিট শাহানা অথূবগী ওইনা চিফ মিনিষ্টর য়ূম্নাম খেমচান্দ সিংহবু ন্যু দিল্লিদা কৌরকখিবগা লোয়ননা ঙরাং নুংথিল পুং ৩:৩০ তাবদা লুচিংবা অনী উনখ্রে। মনিপুরগী মীয়াম্না পাম্লিবা ৱাখল্লোন ময়েক শেংনা খঙই। মীয়ামগী অপাম্বা খূদীঙমক সেন্টরনা থবক্তা ওন্থোক্নবা থৌরাং তৌরি হায়বা ৱাফম য়ুনিয়ন হোম মিনিষ্টরনা চিফ মিনিষ্টরদা ফোঙদোরকখ্রে।
“নো এন আর সি, নো সেন্সস” হায়বা খোল্লাউগী মখাদা মনিপুরগী মীয়াম্না অমত্তা ওইনা চঙশীল্লিবা খোঙজঙ অসীগী মতাঙদা য়ুনিয়ন হোম মিনিস্তরনা মনিপুরগী লুচিংবা কয়াগা ফম্মিন্নদুনা মমাঙদসু খন্ন-নৈনবা লৈখ্রবনি। মনিপুরখক্কি ওইনা য়াম্না অথূবা মতমদা মিনিষ্ট্রি ওফ হোম এফ্যের্সকি মায়কৈদগী সেন্সস য়ৈথোক্নবা ওর্দর অমা থোক্লকপা য়ানা লৈরে হায়না থাজবা য়াবা পাউগী লীখূল অমদা ফোঙদোরক্লি।
অদূম ওইনমক, ৱাফম অসীগী মতাঙদা মনিপুর লৈঙাক্কি মায়কৈদগী করিগুম্বা চেরোল অমত্তা ওফিসিয়েল ওইনা থাদোরকপদি লৈত্রি। লাক্লিবা ওক্টোবর থাগী অহৌবা শরূক্তা য়ুনিয়ন হোম মিনিষ্টর অমিট শাহা মনিপুরদা লাক্তুনা সেনাপটি দিষ্ট্রিক্ট তা অনৌবা মেদিকেল কোল্লেজ অমা শাননবা উরেপ-উয়ুং তমগদৌরি হায়রি। ষ্টেট কেবিনেটনা হন্দক্তা সেনাপটিদায অনৌবা মেদিকেল কোলেজ অমা শাননবা ৱারেপ লৌবসু লৈখ্রবনি।
নেস্নেল হায়ৱে নম্বর-২ য়াওনা লম্বী খূদীঙমক হাংদোক্তুনা মীয়াম চত্থোক-চৎশিন য়াহনবগীদমক অমিট শাহানা চিফ মিনিষ্টরবু থাগৎপা ফোঙদোরকখি।
