মনিপুরগী ওইনা টুরিষ্ট দেষ্টিনেসন সেন্টর ১৩৫ আইদেন্টিফাই তৌরে: দিরেক্তর

মহৌশা লাইরেম্বী ঈমানা শুমহৎলবা মতীক -ময়ায়শিং হাপতুনা,য়েংলু -য়েংলুবদা ফজবতনা থল্লবা ঈরমদম মনিপুরগী ওইনা লমকোয়বশিংনা মীৎফম হোংদোকপা ঙমদ্রবা টুরিষ্ট স্পোট কয়ামরুম লৈরি।মসিমক্না ঈরমদম মনিপুর অসী মীরম্লেনগী নন্দন -কানন নি হায়নরম্লিবনি। ষ্টেট লৈঙাক্কি মায়কৈদগী হৌজিকফাওবদা মালেমগী মফম কয়াদগী লাকপা লমকোয়বশিং,ইন্দিয়াগী অতৈ ষ্টেট শিংদগী লম কোয়বা লাকপগী মশীঙ হন্থরক্লিবা অসী ঐখোয়গী লৈরিবা তঙদূ লৈতাদবা রাজনিটি অমসুং খুন্নাইগী ফীভম কয়া অসীননি।

লো এন্দ ওর্দরগী রাজনিটিগী শেল -থুমগী ফীভম ফগৎলক্লবা মতমদদি লম কোয়বশিংগী মশীঙ শীঙথানিঙায় ওইনা হেঙ্গৎলক্লগনি।টুরিজম ইন্দষ্ট্রি চাওখৎহনবনা ঐখোয়গী হৌরক্লিবা নহারোলশিংদা পাক -সন্না থবক ফংহন্দুনা লমদমশিগী শেল -থুমগী ফীভমসু ফগৎহনবা ঙমগদৌরিবনি।মীৎয়েং অসীনা মাঙদা থম্লগা ষ্টেট কি টুরিজম লোয়শঙনা হৌজিক ফাওবদা টুরিষ্ট দেষ্টিনেসন সেন্টর ১৩৫ আইদেন্টিফাই তৌবা লোইরে হায়না টুরিজম দিপার্টমেন্ট গী দিরেক্তর এল বিক্রম না ফোঙদোকখ্রে।থা অসীগী ১৯ দা ইম্ফালগী মেজোরখুলদা লৈবা মনিপুর প্রেস ক্লবকি হোলদা ষ্টেট টুরিজম দিপার্টমেন্ট অমসুং ওল মনিপুর ৱার্কিং জর্নেলিষ্ট য়ুনিয়ন (অমজু) অনিনা খূৎশম্নদুনা “টুরিজম পোটেন্সিয়েল ইন মনিপুর”,হায়বা থিমদা পাঙথোকখিবা নোংমগী ওইবা মেদিয়া ৱার্কশোপ অমদা দিরেক্তরনা মহাক্কি ৱাফম অসী ফোঙদোরকখিবনি।

চৎলিবা নবেম্বর থা অসীগী ২১ দগী ৩০ ফাওবা ইম্ফাল য়াওনা মনিপুরগী মফম কয়াদা পাঙথোক্কদৌরিবা টুরিজম ফেষ্টিভেল অসীদা মীয়াম্না শৌগৎপিয়ু,শরুক য়াবিয়ু হায়না আপিল তৌরদুনা টুরিজম ফেষ্টিভেল অসী মালেমগী মীয়ামদা নীঙথীনা য়ৌহনবা ঙম্লবদি লমদম অসীগী য়াম্না কান্নবা ওইগনি হায়খি।সঙাই ফেষ্টিভেলদা ষ্টোল হাংগদবা আই দি পিশিংদগী শেল অমত্তা লৈঙাক্না লৌরোই অদুগা ফেষ্টিভেল য়েংনবগীদমক লাকপদসু মখোয়দগী শেল অমত্তা লৌদনা লেম্না য়েংহনগনি হায়খি।লৈঙাক্না আই দি পিশিংগী অৱাবা মুন্না খংঙি,মখোয়বু খুন্দা -লৈতাহন্ননবা অহানবা মীৎয়েং চঙলি হায়নসু দিরেক্তর অসীনা ফোঙদোকখি।