মনিপুরগী লম্বী পূম্নমক মার্চ নিপান্দগী অপন- অরাক অমত্তা য়াওহন্দনা মীয়াম চত্থোক-চৎশীন তৌবা য়াহন্ননবা য়ুনিয়ন হোম মিনিষ্টরনা খঙহনখ্রে

মনিপুরগী নেস্নেল হায়ৱে শিংদা খূৎলায় পায়বা কুকি- মিলিটেন্টশিংনা কাংপোকপী এরিয়াগী তোঙান তোঙানবা মফমশিং য়াওনা অতৈ লম্বী খূদীঙমক্তা মীয়ামদগী নমদুনা শেনখায়- থুমখাই তৌদুনা চত্থোক- চৎশীন তৌবদা অপনবা পীরিবা, মৈতৈ কম্যুনিটিগী মীওইশিংদা অকি-অখঙ থোকহল্লিবা অমসুং মীয়ামগী তঙায়ফদনা চঙদ্রবা য়াদ্রবা পোৎলমশিং পুরকপদা অথিংবা পীদুনা চহী অনীরোম মীয়ামদা অকি অখং থোকহন্দুনা লাক্লিবসি চৎলিবা মার্চ থা অসিগী নিপান্দগী মীয়াম চত্থোক- চৎশীন তৌবদা অপনবা অমত্তা পীহন্দনবা য়ুনিয়ন হোম মিনিষ্টর আমিট সাহানা মরী লৈনবা সেক্যুরিটি ফোর্সশিংদা খঙহনখ্রে।

থা অসীগী অমদা ন্যু দিল্লিদা হোম মিনিষ্টরনা চ্যের লৌদুনা মনিপুরগী ঈরাঙ অসিগী মতাংদা হায়-লেভেল সেক্যুরিটি মিট অমা পাঙথোক্তুনা খন্ন- নৈনখিবগা লোয়ননা ৱাফম অসী মিনিষ্টরনা খঙহনখিবনি। মনিপুরদা হৌখিবা ফেব্রুয়ারি থাগী ১৩ দগী প্রসিদেন্ট রুল থমজিনখ্রবা মতূঙদা পাঙথোকপা ইহান হানবা সেক্যুরিটি মিট অমা ওইখিবা মীফমদুদা ইন্দো-ম্যান্মার ঙমখৈগী মনিপুর পরীংদা ঙমখৈ শম্বল খাবগী থবক চত্থরিবা অসিসু য়াম্না থুনা খূমাঙ চাওশীলহন্দুনা লোইশিন্ননবা, দ্রগকি মায়োক্তা লৌখৎলিবা দ্রাইব হেন্না মপূঙফানা চঙশীন্ননবা, মনিপুর লান্না চঙশীল্লকপা খূৎলায় পায়বা লালহৌবশিং লাকশীন্ননবা, মীতোপ চঙশীল্লকপা থিংবগী থবক খূমাঙ চাওশীন্ননবা অমসুং দ্রগ নেটৱার্ক শিং থুগাইদুনা দ্রগ ফ্রী মনিপুর অমা ওইহন্ননবা অকনবা খোঙথাঙ লৌখৎকদবনি হায়না মিনিষ্টরনা মীফমদুদা অকনবা ৱাফম থমখিবনি।

মীফমদুদা মনিপুরগী গভর্নর অজয় কুমার ভাল্লা, আর্মি অমসুং পেরামিলিটরি ফোর্স কি মকোকথোংবা লুচিংবা কয়াসু শরুক য়াখি।