মনিপুরদসু লৈবাক অসীগী ৭৬ শুবা রিপব্লিক দে থৌরম পাঙথোকখ্রে

লৈবাক অসিগী মফমশিং শীন্থুংনা পাঙথোক্নবগুম চৎলিবা থা অসীগী ২৬ তা মনিপুরদসু তোঙান তোঙানবা দিষ্ট্রিক্টশিংদা, মরী লৈনবা দিষ্ট্রিক্ট এদমিনিষ্ট্রেসনশিংনা শীন্দুনা ইন্দিয়াগী ৭৬ শুবা রিপব্লিক দে থৌরমশিং মপূঙ ফানা পাঙথোক্নখ্রে। ষ্টেটকি থাক্তা ইম্ফাল গী অহানবা মনিপুর রাইফলস গ্ৰাউন্দা রিপব্লিক দে থৌরম পাঙথোকখিবগা লোয়ননা চিফ মিনিষ্টর নোংথোম্বম বিরেন্না অথোয়বা মীথূংলেন ওইনা শরুক য়াখ্রে।

মনিপুর কনবদা অমসুং ইন্দিয়াবু মালেমগী সুপর পাৱার অমা ওইহনবদা মনিপুরদা লৈমিন্নরিবা ঐখোয়গী য়েলহৌমীশিংনা মরূওইবা থৌদাং লৌগদবনি, লৌফমসু থোকপনি হায়না চিফ মিনিষ্টরনা ফোঙদোকখি। ঙসিদি হৌখিবা চহী ১০ গী মতমসিদা প্রাইম মিনিষ্টর নরেন্দ্র মোদিগী লমজীং মখাদা ইন্দিয়া অসী মালেমদা অহুমশুবা খ্বায়দগী চাউরবা ইকোনোমি অমা ওইবা ঙম্লক্লি। লাক্কদৌরিবা কুমশিং ২০৪৭ ফাওবদা মালেমগী সুপর পাৱার লৈবাক অমা ওইননবা হোৎনরক্লি। ঐখোয়না কাঙলূপ-ফূরুপকি অখূবা ৱাখল্লোন থাদোক্নরগা মনিপুর কন্ননবা, ইন্দিয়াবু মাঙলোমদা পুখৎনবা হোৎনমিন্নরসি হায়না চিফ মিনিষ্টরনা মীয়ামদা ফোঙদোকখি।

তোঙান তোঙানবা সেন্ট্রেল অমসুং ষ্টেট ফোর্স পার্সনেলশিং, মনিপুর ফায়র সার্ভিস, ফোরেষ্ট দিপার্টমেন্ট, এন সি সি কেদেটশিং, স্কুল, কোল্লেজশিংদগী লাকখিবা কন্টিনজেন্ট শিংনা পীবা সলামি ষ্টেট কি গভর্নর অজয় কুমার ভাল্লানা ওকখি। হন্দক্তা আসামদগী ট্রেনিং লোইরক্লদুনা মথৌ তৌখ্রবা ১০ শুবা অমসুং ১১ শুবা আই আর বি পার্স নেলশিংনা পীখিবা থৌরম অদুগী পারফোর্মেন্সশিংদসু চিফ মিনিষ্টরনা অপেনবা ফোঙদোক্লদুনা থাগৎখি।