মনিপুরদা পোপ্যুলর লৈঙাক অমা শেম্ননবা সেন্তরগী বিজেপি লুচিংবশিং উননবা ওক্তোবর ৫ দগী হৌরগা মথঙ-মথঙ ন্যু দিল্লিদা চঙশীন্নখিবা বি জে পি মনিপুরগী এম এল এশিং নুমিৎ খরনি দিল্লিদা কেম্প তৌদুনা লৈরবা মতূঙ থা অসীগী ৮ দা বি জে পি মনিপুর ঈন-চার্জগী থৌ পুরিবা সম্বিট পত্রাগা উনদুনা ৱাফম কয়া খন্ন- নৈনখ্রবা মতূঙদা ঙরাং মখাতানা পার্টীগী জেনরেল সেক্রেটরি ( ওরগানাইজেসন) বি এল সন্তোশকা উনরবা মতূঙদা মনিপুরদা অমুক হল্লক্নবা থৌরাং তৌনখ্রে।
মনিপুরদা পোপ্যুলর লৈঙাক অমা শেম্ননবা বি এল সন্তোশকা উনবদা শরুক য়াখিবা এম এল এশিং অদুদি হান্নগী চিফ মিনিষ্টর এন বিরেন, মনিপুর লেজিসলেটিভ এসেমব্লিগী স্পিকর থোকচোম সত্যব্রত্ত, গোবিন্দাশ কোন্থৌজম, থোঙাম বিশ্বজিৎ, খোংবান্তাবম ইবোমচা অমসুং য়ূম্নাম খেমচান্দ নি।
হৌজিক বিহার এসেমব্লী ইলেক্সনগীদমক য়াম্না কন্না থবক পায়খৎলিবা মরম্না অতৈ থবক-থৌরমশিংদা মপূঙফানা মায় ওন্সীনবা ঙমদবগী ফিভমদা লৈরি। ইলেক্সন অসী নবেম্বর ১৪ দা মপূঙফানা লোইশিল্লগনি। মসীগী মতূঙ য়াম্না অথুবদা মনিপুরদা পোপ্যুলর লৈঙাক অমা শেম্ননবা থৌরাং পায়খৎননবা বি জে পিগী নেস্নেল লিদরশিংগী মায়কৈদগী অয়াবা পীরক্লে হায়না বি এল সন্তোশনা ফোঙদোরকখিবা মতূঙদা এম এল এশিং অসী ইম্ফাল দা হল্লক্নবা থৌরাং তৌনখিবনি হায়রি।
