১২ শুবা মনিপুর লেজিসলেটিব এসেমব্লিদা জনটা দল য়ুনাইটেদ (জে দি য়ু) কি এম এল এ ৬ লৈবগী মনূংদা বি জে পিদা চোংশিনখিবা এম এল এ মঙাগী মরায়বক করি ওইরগদগে হায়বসি হৌজিক তম্বা ঙমদবা ফীভম অমা মায়োক্নরগা লৈখ্রে। মখোয় মঙাগী মথক্তা কংগ্রেস পার্টিনা এন্টি-দিফেক্সন লোগী মখাদা দিসক্বালিফাই তৌবিয়ু হায়না এসেমব্লি স্পিকরগী ট্রাইব্যুনেলদা থাঙ্গৎলকখিবা দিসক্বালিফিকেসন কেসকি ফাইনেল হিয়ারিং হন্দক ফেব্রুয়ারি থা অসিগী ৭ তা চত্থরবা মতূংদা পেটিস্নরগী কাউন্সেলনা পীখিবা আরগ্যুমেন্ট ষ্টেটমেন্ট কয়াদু এসেমব্লি গী স্পিকরনা য়াম্না মুন্না, পূক্নিং চঙনা তাখি। মদূগী মতূঙদা স্পিকরনা মহাক্কি জজমেন্ট অদূ রিজার্ব তৌরে হায়না লাউথোকখ্রে।
য়াম্না অথূবা মতমদা জজমেন্ট অদূ লাউথোরকপা য়াবগী থাজবা লৈরি হায়রি। ১২ শুবা মনিপুর লেজিসলেটিব এসেমব্লিদা জনটা দল য়ুনাইটেদ কি টিকেট্টা মীওই তরুক মায় পাক্লক্তুনা এম এল এ ওইখিবনি। মখোয় অদূদি থাংমৈবন্দ কেন্দ্রদগী খুমুকচম জয়কিষন, সাইটু কেন্দ্রদগী ঙুরশাংলুর সনাতে, জিরিবাম কেন্দ্রদগী আসব উদ্দিন, ৱাংখৈ কেন্দ্রদগী থাংজম অরুনকুমার, চুরাচান্দপুর কেন্দ্রদগী এল এম খৌতে অমসুং লিলোং কেন্দ্রদগী মোহম্মদ অব্দুল নাশির হায়রিবা তরুক অসীনি।
লিলোং কেন্দ্রদগী মোহম্মদ অব্দুল নাশির হায়রিবা অসীদি মশাগী হান্নগী পেরেন্ট পোলিটিকেল পার্টি অসিদা লেঙদনা অদুম্মক লৈহৌরবসু লেমহৌরিবা এম এল এ মঙা অসিদি য়াম্না ঙন্না রুলিং বি জে পিদা চোংশিনখিদুনা রুলিংগী বেঞ্চতা ফমদুনা এসেমব্লি মীফমশিংদা শরূক য়াখ্রবনি। মখোয়গী মথক্তা, এন্টি-দিফেক্সন লোগী মখাদা দিসক্বালিফিকেসন কেস অমা কংগ্রেস পার্টিনা থাঙ্গৎলকখিবা অদূ সুপ্রিম কোর্ট ফাওবা য়ৌরুরবা মতূঙদা মনিপুরগী এসেমব্লি স্পিকরগী ট্রাইব্যুনেলদা কেস পায়খৎনবা খঙহল্লকখ্রবা মতূঙদা মথঙ মথঙ কেস চত্থরক্তুনা ফাইনেল হিয়ারিং তৌখিবনি।